ଅପେକ୍ଷା
ଅପେକ୍ଷା
1 min
130
ପ୍ରେୟଶୀର ପ୍ରଶଂସାରେ ଶତମୁଖ ହୋଇ
ଅଲୋଡା ସମାଜରେ
ସ୍ୱାଭିମାନର ଜିଦରେ ଅଟଳ ରହି
ପ୍ରତାରଣାର ତୂଳୀଧରି ଛବି ଆଙ୍କିଲେ
କ'ଣ ମୋ ଇଚ୍ଛା ପୂରଣ ହେବ ।
ଋତୁର ପରଶରେ
ଫୁଲର ପାଖୁଡା ଉନ୍ମୋଚିତ ହେଲେବି
ନର୍କ ଭିତରେ ରହି
ଅଭିମାନର ଗୁଚ୍ଛ ସାଉଁଟିଲେ
ମନରେ ପବିତ୍ରତା ଆସିବ କେଉଁଠୁ ।
ତୁମ ପ୍ରୀତି ପରଶରେ
ଉଦଭାସିତ ହୋଇ
ପଚାମାଂସର ବାସ୍ନାକୁ
ଢକଢକ କରି ପିଇଯାଇଛି ମୁଁ ।
ତଥାପି,ଅବାଧ୍ୟକୁ କରାୟତ୍ତ କରି
ଅପେକ୍ଷା ତୁମ ଫେରିବା ବାଟକୁ
ଝରକା ଫାଙ୍କରେ
ଗାଁ ମୁଣ୍ଡ ଅଙ୍କାବଙ୍କା ରାସ୍ତାକୁ ଅନାଇ ଜଗିଛି
କାହିଁକିନା ମୁଁ ଜାଣିଛି
ପ୍ରକୃତି ପ୍ରଦତ୍ତ ଅମୂଲ୍ୟ ଉପହାର
କେବେ ମୂଲ୍ୟହୀନ ହେଇପାରେନା ।