ଇଲିସି

ବୁଢା ବୁଢୀ ଦୁହେଁ ଏକାଠି ରହନ୍ତି

ମଫସଲ ଗାଆଁ ଘରେ  

ପୁଅ ବୋହୁ ତାଙ୍କ କରନ୍ତି ଚାକିରି

ସୁଦୂର ଆମେରିକାରେ ।

ଇଲିସି ମାଛଟେ ଆଣିଥିଲା ବୁଢା

ବୁଢୀ କରିଛି ରୋଷେଇ  

ସମଭାବେ ବାଣ୍ଟି ଖାଇଲେ ଶାନ୍ତିରେ

ଖଣ୍ଡିଏ ମାଛ ବଳଇ ।

ବୁଢା କହେ କାଲି ଖାଇବି ସେ ଖଣ୍ଡ

ମୁଁ ଖାଇବି ବୁଢୀ କହେ  

ବୁଝାମଣା ହେଲା ସେଇ ହିଁ ଖାଇବ 

ବିଳମ୍ବେ ଉଠିବ ଯିଏ।

ମଧ୍ୟାହ୍ନ ହୋଇଲା ମାଛ ଲୋଭେ କେହି

ଉଠୁନାହିଁ ବିଛଣାରୁ  

ଯେବେ ଗ୍ରାମବାସୀ ବାଡାନ୍ତି କବାଟେ

ନ ଆସେ ଶଦ୍ଦ ଭିତରୁ ।

ବାଧ୍ୟ ହୋଇ ଲୋକେ ଭାଙ୍ଗନ୍ତି ଦରଜା

ଶୋଇଛନ୍ତି ବୁଢ଼ା ବୁଢ଼ୀ  

ମୃତାହତ ଭାବି ମଶାଣି ନେବାକୁ

ସଜାନ୍ତି ବସି ସଙ୍ଗାଡ଼ି ।

ଉଠାନ୍ତି ବୁଢାକୁ କହଇ ସେ ଧୀରେ

ବୁଢୀକୁ ଉଠାଅ ଆଗ  

ବୁଢିକୁ ଟେକନ୍ତି ପାଟିକରି କହେ 

ମାଛେ ନାହିଁ ବୁଢ଼ା ଭାଗ ।

ଗ୍ରାମବାସୀ ଆଗେ ଭିତିରି ରହସ୍ୟ

ବିସ୍ତୃତରେ କହେ ବୁଢୀ  

ମାଛ ଖଣ୍ଡେ ପାଇଁ ଏତେ କଥା ସର୍ବେ

ହସିହସି ଗଲେ ଗଡ଼ି ।