Library
Profile
ଈଶ୍ବର
ଈଶ୍ବର
ହେ ଈଶ୍ଵର
ତୁମେ ପ୍ରାଣମୟ ପ୍ରଣବ ଓଁକାର
ନାଦବ୍ରହ୍ମ ଏଇ ନିଖିଳ ବିଶ୍ଵର
ବେଦ ସୁକ୍ତ ଆଉ ଉପନିଷଦର
ଚ଼ରମବିଶ୍ଵାସ ଭାବନିରାକାର ।
ହେ ଈଶ୍ଵର
ଅମୃତସନ୍ଦେଶ ଶାନ୍ତିପ୍ରବାହର
ଚିର ଆକାଂକ୍ଷିତ ଆତ୍ମଫୁଲର
ସ୍ୱର୍ଣ୍ଣିମ ସ୍ଵାକ୍ଷର ଶୁଦ୍ଧ ଭାବନାର
ଦୁର୍ବାର କାମନା ଦିବ୍ୟ ଜୀବନର ।
ହେ ଈଶ୍ଵର
ଅମର ଔଷଧି ତୁମେ ଯନ୍ତ୍ରଣାର
ଅମ୍ଲାନଆଲୋକ ଆତ୍ମପ୍ରଦୀପର
ବୋଧିଦ୍ରୁମ ତୁମେ ସାଧନାସିଦ୍ଧିର
ଅଦୃଶ୍ୟ ନାୟକ ବିଶ୍ଵ ବ୍ରହ୍ମାଣ୍ଡର ।
ହେ ଈଶ୍ୱର
ପବିତ୍ର ହବନ ଜୀବନ ଯଜ୍ଞର
କୁଣ୍ଡଳିନୀ ଶକ୍ତି ତୁମେ ଏ ପିଣ୍ଡର
ସ୍ନିଗ୍ଧ ତରୁ ଛାଇ କଳ୍ପ ପାଦପର
ମଧୁର ସୁବାସ ଜୀବନ ପୁଷ୍ପର ।
ହେ ଈଶ୍ଵର
ତୁମେ ତ ନାଉରୀ ଭବସାଗରର
ପ୍ରଲୟ ପୟୋଧୀ ତୁମ ସୃଜନର
ବିଶ୍ୱ ରଙ୍ଗମଞ୍ଚେ ତୁମେ ସୂତ୍ରଧର
ଚାକ୍ଷୁଷ ପ୍ରମାଣ ପ୍ରେମପ୍ରଣୟର ।
ହେ ଈଶ୍ଵର
ତୁମେ ସତ୍ୟ ଶିବ ତୁମେ ହିଁ ସୁନ୍ଦର
ତୁମେ ପରା ବନ୍ଧୁ ନିଃସ୍ୱ ଜନତାର
ପ୍ରାଣର ପ୍ରବାହ ସପତ ସୁରର
ସିଦ୍ଧ ସନାତନ ପ୍ରପନ୍ନ ପୁଣ୍ୟର ।
ହେ ଈଶ୍ଵର
ଶୁଭ ଶଙ୍ଖ ନାଦ ଆତ୍ମ ମନ୍ଦିରର
ରଜତ ଶୁଭ୍ର ଜୋଚ୍ଛାନା ଜହ୍ନର
ତୁମେ ପରମାଣୁ ଶକତି ଅଣୁର
ତୁମେ ପାରିଜାତ ହୃଦ କାନନର ।
ହେ ଈଶ୍ୱର
ତୁମେ ପୂର୍ଣ୍ଣ ରୂପ ଆନନ୍ଦ ପ୍ରୀତିର
ମୁକ୍ତ ଚେତନା ମୁମୁକ୍ଷୁ ହୃଦର
ତୁମେ ଅନ୍ତର୍ଯ୍ୟାମୀ ସମସ୍ତ ଜୀବର
ନିବିଡ ବନ୍ଧନ ଜଡ ଚେତନର ।
ହେ ଈଶ୍ୱର
ଆକାଶର ସ୍ତମ୍ଭ ଉତ୍ତାପ ଅଗ୍ନିର
ବିକ୍ଷୁବ୍ଧ ଲହରୀ ସାଗର ବୁକୁର,
ତୁମେ ପ୍ରତିବିମ୍ବ ସ୍ଵଚ୍ଛ ଅଇନାର
ତୁମେ ହିଁ ଆକାର ବିଶ୍ଵପ୍ରକୃତିର ।
ହେ ଈଶ୍ଵର
ତୁମେ ମୂଳାଧାର ସ୍ଥିତି ପ୍ରଳୟର
ତୁମେ ହିଁ ସ୍ରଷ୍ଟା ସୂଷ୍ଟି ପ୍ରାଣ ଧାର
ଅନନ୍ତ ଆକାଶେ ଜ୍ୟୋତିଚ଼ପଳାର
ସୀମାହୀନବ୍ୟାପ୍ତି ତୁମେଭୂଲୋକର ।
ହେ ଈଶ୍ଵର
ଶ୍ରେଷ୍ଠ କର୍ମକାର ଲୌକିକ ସୃଷ୍ଟିର
ଚିର ଇପ୍ ସୀତ ମୁକତିକାମୀର
ତୁମେ ଦିବ୍ୟ ଦୃଷ୍ଟି ଦୃଷ୍ଟିହୀନର
ତୁମେ ଶଦ୍ଦବ୍ରହ୍ମ କବି କବିତାର ।
