ଇଚ୍ଛା

ବର୍ଷ ପରେ ଲାଗୁଚି ଆଜି,

ଯେପରି ହାତ ଖୋଲି ଅମ୍ବର

ମାଟିକୁ ଇଶାରା କରୁଛି...

ଆକାଶ ଛାତିରେ ଡେରିବାକୁ କାନ

ଥରୁଟିଏ ମାଟିର ଇଚ୍ଛା

ଶୂନ୍ୟତାର ସରହଦକୁ ଚିରି ।।

ହାତଠାରି ଡାକୁଛି ଜହ୍ନ

ଦେବା ପାଇଁ

ଗୋଲାପୀ ଗାଲରେ 

ସ୍ନେହର ଚୁମ୍ବନଟି...

ରୂପସୀ ଅନ୍ଧାରି ରାତିରେ

ଡେଣା ମେଳି ଉଡିଯିବାକୁ

ଥରୁଟିଏ କଇଁ ର ଇଚ୍ଛା

ଅୟୁତ ଯୋଜନ କୁ ଚିରି ।।

ସଜାଇଛି ଛାୟାପଥ

ତାରା ଫୁଲେ ସୂରୁଜ

ଗୋପନେ ପଠେଇଛି 

ମେଘସବାରୀ ...

ହସ ହସ ସରାଗେ

ଖେଳିଯିବାକୁ ବାହୁଯୁଗଳେ

ଥରୁଟିଏ କୁମୁଦିନୀ ର ଇଚ୍ଛା

ଅଦୃଶ୍ୟ ବନ୍ଧନକୁ ଚିରି ।।