ହେ ମହାବାହୁ

ଆଖି ମୋର ଦେଖୁ ପତିତପାବନ 

କାନ ତୋ ଭଜନ ଶୁଣୁଥାଉ,

ନାକ ମୋର ଶୁଙ୍ଘୁ ତୋ ଗନ୍ଧ ଚନ୍ଦନ

ପାଟି ତୋର ନାମ ଡାକୁଥାଉ।

ଜିହ୍ବା ମୋର ଚାଖୁ ତୋ ମହାପ୍ରସାଦ 

ଦନ୍ତ ଦେଖି ତୋତେ ହସୁଥାଉ,

ହାତ ମୋର ଦୁଇ ଗରୁଡ଼ ପଛରୁ

ତୋ ନାମ କୁ ଧରି ଉଠୁଥାଉ।

ପାଦ ଦୁଇ ମୋର ତୋର ଦରଶନେ

ପୁରୀ ବଡଦାଣ୍ଡ ମାଡୁଥାଉ,

ମଥା ମୋର ପ୍ରଭୁ ତୋ ପାଦପଦ୍ମ ରେ

ଆଜୀବନ ଜଗା ନଇଁ ଥାଉ ।

ହୃଦୟେ ମୋହର ତୋର ଶ୍ରୀ ମନ୍ଦିର

ଦାରୁ ରୂପ ତୋର ବିଜେ ଥାଉ,

ଭାବ ରଜୁ ସହ ତୋର ମୋର ଡୋର

ପ୍ରାଣ ଯିବା ଯାଏ ବନ୍ଧା ଥାଉ।

ହେ ବଳିଆର ଭୂଜ ହେ ମହାବାହୁ

ମୋ ଶ୍ବାସ ରେ ତୋ ନାମ ମିଶି ଯାଉ

ଜୀବ ଗଲା ବେଳେ ତୋ ଚକା ନୟନ 

ଆଖି ଆଗରେ ମୋ ଭାସିଯାଉ,

ଏ ମାଗୁଣି ମୋର ପୂର୍ଣ୍ଣ ହେଉ

ଜୟ ଜଗନ୍ନାଥ ଜୟ ଜଗନ୍ନାଥ  

ତୁଣ୍ଡ ମୋର ସଦା ଘୋଷୁଥାଉ।