ପୁରୀରେ ବସନ୍ତ ଆସିଛି

ବସନ୍ତର ମୃଦୁ ମଳୟ ପରଶେ 

ରଙ୍ଗ ରଙ୍ଗିଆ କି ଦିଶୁଛି

କାଳିଆରେ ରାଧା ମନେ ପଡିଯିବ

ପୁରୀରେ ବସନ୍ତ ଆସିଛି ।

ବଇଁଶୀର ସ୍ୱର ଗୁଞ୍ଜୁରୀ ଉଠୁଛି 

ଫଗୁଣ ଫଗୁଣ ବାସୁଛି 

କାଳିଆରେ କେଳି ମନେ ପଡିଯିବ 

ଶ୍ରୀକ୍ଷେତ୍ରେ ମଳୟ ବହୁଛି।

ବଉଳର ବାସ ବାସେ ଚଉପାଶ

କୋଇଲି ପଞ୍ଚମେ ଗାଉଛି 

କାଳିଆରେ ରାସ ମନେ ପଡିଯିବ

ପୁରୀରେ ଫଗୁଣ ଆସିଛି।

ରଙ୍ଗର ଅବିର ଫଗୁ ପସରା ରେ

ଚାରିଆଡେ ମେଲି ହୋଇଛି  

କାଳିଆରେ ହୋଲି ମନେ ପଡିଯିବ 

ଫଗୁ ଦଶମୀଟି ଆସୁଛି।

ମଧୁ ମାଳତୀର ମହକରେ ସତେ

ମଳୟ ପାଗଳେ ବହୁଛି 

କାଳିଆରେ ଗୋପ ମନେ ପଡିଯିବ 

ପୁରୀରେ ମଳୟ ବହୁଛି।

ତୋ ପୁରୀରେ ବସନ୍ତ ଆସିଛି ।