ହାରି ଯାଇଥିବା ଲୋକ

ହାରି ଯାଇଥିବା ଲୋକର

କି ଅଛି ପୁଣି ହରାଇବା ପାଇଁ

ଆଉ କିସ ହାରିବାକୁ ତା'ର ଡର?

ଜୀବନ ମରଣ ଅମୃତ ଗରଳ

ମାନ ଅପମାନ ସମ୍ମାନ ଦୁର୍ନାମ

ସବୁ ତା ପାଇଁ ସମାନ l

ଦୁନିଆର ଉପହାସ

ଥଟ୍ଟା ମଜା ଟାହି ଟାପରା

ସବୁ ତା ପାଇଁ ଅଗୁରୁ ଚନ୍ଦନ l

କାଳ ବୈଶାଖୀର ଝାଞ୍ଜି

ପ୍ରଳୟର ଅସହ୍ଯ କମ୍ପନ

ସବୁ ତା ପାଇଁ

ମନ୍ଦ ମଳୟ ପବନ l

ହାରି ଯାଇଥିବା ଲୋକ

ଅଟଇ ଜୀଅନ୍ତା ଭୂତ

ବଞ୍ଚିବାର ତୃଷ୍ଣା ନାହିଁ ଯା'ର

ତା'ର କାହାରିକୁ ପୁଣି ଡର?

ହାରିଯାଇଥିବା ଲୋକ ପାଇଁ

ଆଉ ହାରିବାକି ନୂଆ କଥା

ହାରି ହାରି ସବୁ ଜିତିବ ସେ

ଦିନେ ଦୁନିଆଁ ତା ଆଗେ

ନୋଇଁବ ମଥା ।