ଗୁରୁ ମୋର ବ୍ରହ୍ମା ବିଷ୍ଣୁ

  

ଗୁରୁ ମୋର ବ୍ରହ୍ମା ବିଷ୍ଣୁ ଗୁରୁ ମହେଶ

ଶତ ଶତ ପ୍ରଣିପାତ ଦେବ ଦେବେଶ

ଗୁରୁ ଜ୍ଞାନ ଗୁରୁ ଧ୍ୟାନ ଗୁରୁ ମହାନ

ବୁଦ୍ଧି ଦାତା ସିଦ୍ଧି ଦାତା ପ୍ରଣାମ ଘେନ

ଜ୍ଞାନର ପ୍ରଦୀପ ଜାଳି

ଦିଅ ହେ ତମସା ଟାଳି

ପାଦେ ପାଦେ ଲୋଡା ତୁମ ସ୍ନେହ ଆଶିଷ

ଗୁରୁ ମୋର ଜୀବନର ପ୍ରେରଣା ଉତ୍ସ

ଆନନ୍ଦ ଉଛ୍ବାସ ଶକ୍ତି ଆଶା ବିଶ୍ବାସ

ଅନ୍ଧାରୁ ଆଲୋକେ ଗୁରୁ ଦେଖାନ୍ତି ବାଟ

ସେ ଆଲୋକେ ଆଲୋକିତ ଜୀବନ ସ୍ରୋତ

ଗୁରୁଙ୍କର ପାଦ ଧୂଳି

ମୋ ପାଇଁ ଚନ୍ଦନ ଭଳି

ମଥାରେ ହୋଇଲେ ବୋଳି ମିଳେ ସାହସ

ଗୁରୁଙ୍କର ଉପଦେଶ ମହତ ବାଣୀ

ଯା ଲାଗି ଜୀବନ ଯୁଦ୍ଧ ପାରୁଛି ଜିଣି

ସାଧନା ସିଦ୍ଧି ରେ ଗୁରୁ ଆଦର୍ଶ ମୋର

ତାଙ୍କ ପାଇଁ ପରିପୂର୍ଣ ଜୀବନ ପାତ୍ର

ଅସୁଝା ତାଙ୍କରି ଋଣ

ସମର୍ପିତ ପାଦେ ପ୍ରାଣ

ଗୁରୁ ମୋର ଦିବ୍ୟଜ୍ଯୋତି ପ୍ରଜ୍ଞା ପୁରୁଷ ।