ଗଢ଼ିଦେବା ପୁଣି ଆମ ରାଇଜ
ଗଢ଼ିଦେବା ପୁଣି ଆମ ରାଇଜ
କାହିଁ ବାରବାର କରଇ ପ୍ରହାର
ଦୈଵ ଦୁର୍ବିପାକ ଉତ୍କଳ ବକ୍ଷେ
ବିଶ୍ୱ ନିୟନ୍ତାର ବିଚିତ୍ର ବିଚାର
ବାଧକ ସାଜୁଛି ଆମରି ସୁଖେ ।
ପ୍ରଗତିର ପଥେ ବିଜ୍ଞାନର ରଥେ
ଗଢିଥିଲୁ ଯେଉଁ ଯନ୍ତ୍ର ଜଗତ
ନିର୍ଜନ ନିଶୀଥେ ବିଶ୍ୱାସର ସାଥେ
ରାଜ୍ୟବାସୀ ହେଉଥିଲେ ନିଦ୍ରିତ ।
କାଳର କରାଳ କରିଲା ଦୁର୍ବଳ
ଭାଙ୍ଗିଦେଲା ଆମ ମେରୁଦଣ୍ଡକୁ
ହୋଇଲା ଅଚଳ ସମ୍ପଦ ସକଳ
ଭାଙ୍ଗିନାହିଁ କିନ୍ତୁ ଆମ ବଳକୁ ।
ହାତ ସାଥେ ହାତ ମିଶାଇ ଏକତ୍ର
ଗଢ଼ିଦେବା ପୁଣି ଆମ ରାଇଜ
ମନ କରି ଶକ୍ତ ଆମେ ଦିବାରାତ୍ର
ଚାଲୁକର ପୁନଃନିର୍ମାଣ କାର୍ଯ୍ୟ ।
ଭୁଲି ଦୁଃଖକ୍ଳେଶ ଆସ ଭାଇ ଆସ
ଭଙ୍ଗା ସପନକୁ କରିବା ପୂର୍ଣ୍ଣ
କିଛି ଦିନ ମାସ ଲାଗିବ ଅବଶ୍ୟ
ଫେରାଇ ଆଣିବା ଆମରି ଧନ ।
ଗଛ ଲଗାଇବା ଯତ୍ନରେ ପାଳିବା
ସବୁଜ ସୁନ୍ଦର ହୋଇବ ମହୀ
ହୃଦେ ଜାତିସେବା ଯଦି ଆବୋରିବା
ଜଗତେ ସୁନାମ ଅର୍ଜିବା ଭାଇ ।