ଗ୍ରହ

କପେ ଚା ଦେଇ ଟେବୁଲ୍ ପାଖରେ 

ଠିଆ ହୋଇ ଗଲେ ପାଖେ ଶ୍ରୀମତୀ

ଆଖିରେ ଆଖି ଟା ମିଶିଗଲା ପରେ

ମୁରୁକି ହସଟେ ଦେଲି ମୁଁ ହସି ।

କାହିଁକି ହସିଲ ମନେ ମନେ ତୁମ

ତୃଟି ରହିଲା କି କେଉଁଠି ମୋର 

ନକହିବା ଯାଏ ଏଠାରୁ ଯିବିନି

କବିତା ଲେଖାରେ ପଡ଼ିବ ଡୋର ।

କହୁଅଛି ଏବେ ମନ ଦେଇ ଶୁଣ 

ଭାବିବନି ମିଛ କହୁଛି ମୁହିଁ 

ରାହୁ ଶନି ଦୁଇ ଗ୍ରହ ଆମପାଇଁ 

ଦୁଃଖ ବୋଝ ଧରି ଆସନ୍ତି ଧାଇଁ ।

ବନ୍ଧୁ ଜଣେ ମୋର ଦେଲେ ଉପଚାର

ସରଳ ଭାବରେ ଦେଲେ ବୁଝାଇ

ସ୍ଵାମୀ ପାଦେ ବାସ ଶନି ଦେବଙ୍କ ର

ଘରଣୀ ହାତରେ ରାହୁ ବସଇ ।

ସେହି କଥା ଭାବି ହସି ଦେଲି ମୁହିଁ 

ଥିଲ ବୋଲି ତୁମେ ମୋର ପାଖର 

ଯଦି ରାହୁ ଶନି ଆମ ପାଖେ ପାଖେ

ବିପତ୍ତି ଆସିବ ଅନେକ ବାର ।

ରାହୁ ଶନି ଦେବା ପାଖରୁ ଦୂରେଇ 

କରି ଅଛି ମୁହିଁ ଗୋଟେ ଉପାୟ

କଥା ମୋର ମାନି ଉପାୟ ଟି ଶୁଣ 

ନିତି ଧ୍ୟାନ ଦେଲେ ହୋଇବ ଜୟ ।

ତୁମ ହାତ ରାହୁ ମୋ ପାଦ ଶନି କି

ଘଷି ମୋଡ଼ି ଦେଲେ ଅନେକ ଥର 

ଛାଡି ପଳାଇବେ ନିତି ଏହା କଲେ 

ରାହୁ ଶନି ଭୟ ହୋଇବ ଦୂର ।