ଗୋଟେ ଗୋଧୂଳିର ଚିତ୍ର
ଗୋଟେ ଗୋଧୂଳିର ଚିତ୍ର
ସମୟ କାଂଥରେ
ଗୋଟେ ଗୋଧୂଳିର ଚିତ୍ର
କାହିଁ କେବେଠୁ ଲଟକିଛି ଯେ
ଫିକା ପଡିନି ରଂଗ
କାହିଁକି ଜାଣ
ବାକି ଅଛି କିଛି କଥା.....
ଯେଉଁ ଦିନ କଥା ହୋଇଯିବା
ଦେଖିବ ଧଡ୍ କରି ଘନେଇ ଆସିବ ରାତି,ଅଂଧାର
ଯୋଉ ରାତିର ସକାଳ ପାଇଁ
ଅନେକ ଜନ୍ମ ଅପେକ୍ଷା ରଖେ
ଥାଉ ସେ କଥା ଅକୁହା
କିଛି ଅକୁହା କଥାର ଅନ୍ୟନାମ ହିଁ ତ ଜୀବନ
ଯାହା ତମେ ଭୋଗ
ମୁଁ ଭୋଗେ
ଦେଖିଲ
ଚିତ୍ର ଭିତରୁ କେମିତି ଶୁଭୁଛି
ଗୋଟେ ବଂଶୀ ସ୍ଵର
ଆଉ ଠିକ୍ ତାଳେ ତାଳେ
ନାଚୁଛି ଅପେକ୍ଷାର ପାଉଁଜି ହଳେ
ନଈପଠାରେ
କଦମ୍ବର ଋତୁଟିଏ
ଅଟକେଇବା କ'ଣ କମ୍ ତପସ୍ୟାର କଥା
ନା ଗୋଧୂଳି ଗୀତରେ ସ୍ଵର ଦେବା ସହଜ
ଚାଲ ଯୋଡିଦେବା
ଆହୁରି ଅନେକ ଅକୁହା କଥା
ତମେ ମୋର
ମୁଁ ତମର.....