ଗୋପନ ନଗ୍ର
ଗୋପନ ନଗ୍ର
ଡ. ସନ୍ତୋଷ ଦେବତା
ଆତ୍ମୀୟ ହେଲେ ବି ,
ତିଥି ନ ଜଣେଇ ଆସିଲେ ଅତିଥି ।
ନାରୀ ହେଉ ବା ହେଉ ପୁରୁଷ ,
ସତର୍କ ନ ହେଲେ
ସିନ୍ଦୁକରୁ ଚୋରୀ ଯିବ ସାଇତା ରକତ....
ଛିଡାହୁଏନି ଗୋଡଭାଙ୍ଗି ଦୀର୍ଘ ସମୟ
କାହା ଦୁଆରେ ,
ଦୟାଶୀଳ ଦସ୍ୟୁ ପରି ସାରିଦିଏ କାମ
ସଅଳ ସଅଳ ପଡୋଶୀ ଘରେ ,
ଶୋଇଥିବା କୁକୁର ମୁହଁକୁ ଫିଙ୍ଗିଦେଇ
ବଶର କୈବଲ୍ୟ ।
ପ୍ରତ୍ୟେକ ଜୀବରେ ଥାଏ ଦେବଭାବ
ସାଧୁ ହେଉ ବା ହେଉ ଚୋର ,
ଅତିଥି ଦେବୋ ଭବ ।
ସେ ଶିଖାଏ , ଗୃହଶତ୍ରୁ ଭୟଙ୍କର....
ଜୀବନକୁ ଲୁଚାଅନି
ଘରର ପଛ ଦରଜା ବନ୍ଦ ରଖନି ,
ଜାଣିଯିବ ତମ ପାଇଁ କେହି ଜଣେ ,
କୋଉଠି ନା କୋଉଠି ,
ତିଆରି ରଖିଛି ଏକ ଗୋପନ ନଗ୍ର !