"ଗୋଲାପି ଥଣ୍ଡାର ନିଶା"

ଗୋଲାପି ଥଣ୍ଡାର ନିଶା

ଗଗନୁ ଝରୁଛି ଦୁଧିଆ ଜୋଛନା,

ଲେପୁଛି ଉଷୁମ ଆବେଗ

ଅଳସୀ ଚାହାଣି,

ମୁଦିତ ନୟନ ,

କଜ୍ଜଳ ଦେଉଛି ଯନ୍ତ୍ରଣା ।

ରଙ୍ଗୀନ, ନିଆରା ଏଇ ଅନୁଭବ,

ଥରାଉଛି ହୃଦ,

ମୃଦୁ ସେ କମ୍ପନ,

ଗୋଲାପି ଥଣ୍ଡାର ପାଦ ଶବ୍ଦ

ଶିହରିତ ମନ ଅଗଣା ।

ଭିଜା ଭିଜା ପବନ,

ମୁକୁଳା ବିନ୍ଦାସ ଆକାଶ,

   ଓଃ

ଗୁଣୁଗୁଣୁ ଶୀତର ସଙ୍ଗୀତ

ଧୂଆଁ ଧୂଆଁ କୁହୁଡ଼ି ର ଜାଲ,

ସକାଳର କୁଆସ ଦେଇ,

ଉଙ୍କି ମାରୁଛି, ଗୋଲାପର ନାଲି ପାଖୁଡ଼ା ।

ରୂପେଲି ଶିଶିର ଛାଇଛି ,

ସବୁଜ ଘାସର ଗାଲିଚା

ବିଛାଡି ପଡ଼ିଛି ଶେଫାଳୀ,

ମହକି ଯାଉଛି ବାସ୍ନା ।

ରଜନୀ ବକ୍ଷରେ ଝଡ଼ିଛି,

ସ୍ମୃତିର ଶୁଖିଲା ପତ୍ର

ଫୁଟିଛି, ଆଶାର ଅଙ୍କୁର,

ନିଷ୍ପ୍ରଭ ହୋଇଛି ଇନ୍ଦୁ!

ଝିଲ୍ ମିଲ୍ ଜଳ କାଚ କେନ୍ଦୁ,

ଉଷାର କୋମଳ କିରଣ,

ପରଶେ ମୁଁ ଆତ୍ମ ବିଭୋର ।