ଗୋଲାପ ତୁ ବାସୁ ଫୁଟି

ମହମହ ହୋଇ ବାସୁଅଛୁ ଫୁଟି

ଗୋଲାପ ତୁ ନାନା ରଙ୍ଗେ,

ଭାରି ଇଚ୍ଛା ହୁଏ ମନ ଖୋଲି ଆଜି

କଥା ହେବି ତୋହ ସଙ୍ଗେ ।

ମଝିରେ ରୋକିବୁ ନାହିଁ;

କିଏ ଆସିଗଲେ ମୁଣ୍ଡ ଟୁଙ୍ଗାରିକି

ଠାରି ଦେବୁ ମୋତେ ଚାହିଁ ।

ବାପା ମାଆଙ୍କର ଗେହ୍ଲେଇ ଝିଅ ମୁଁ

କଲେଜ ଯାଉଛି ନୂଆ,

ପାଠରେ ଆଗରୁ ମନ ଲାଗୁଥିଲା

ଏବେ ହୁଏ ଅମାନିଆ ।

ଖୋଲିକି ବସିଲେ ବହି;

ଭାବନା ରାଇଜେ ପକ୍ଷୀରାଜ ଚଢ଼ି

ଆସିଯାଏ ଜଣେ କେହି ।

ଏ ଲାଜ କଥାକୁ କା' ଆଗେ କହିବି

ଶୁଣିଲେ ହସିବ କିଏ,

ଆଉ କେ କହିବ ବଡ଼ ଅଲାଜୁକି

ଝିଅଟା ଲୋ ମାଆ ଇଏ ।

ତେଣୁ କହୁଅଛି ତୋତେ;

ଏଇ ବୟସରେ ସଭିଙ୍କ ଅବସ୍ଥା 

ହୁଏ କି ଏମିତି ସତେ !!