ଗଣତନ୍ତ୍ର ଗାଥା
ଗଣତନ୍ତ୍ର ଗାଥା
ସ୍ୱାଧୀନ ଭାରତ ଗଣତନ୍ତ୍ର ରାଷ୍ଟ୍ର
ସର୍ବ ଧର୍ମ ସମନ୍ୱୟ ।
ହିନ୍ଦୁ ମୁସଲମାନ ଜୈନ ଖ୍ରୀଷ୍ଟିଆନ
ଆମେ ସବୁ ଭାରତୀୟ ।୧।
ଭାରତ ମାତାର କୋଳରେ ଜନମ
ଏହି ମାଟି ଆମ ମାଆ ।
ସଂକୋଚ କାହିଁକି ମନରେ ଆମର
ରଖିବାକୁ ତା'ର ନାଆଁ !୨!
ପାକିସ୍ଥାନ ବାସୀ ପାକିସ୍ଥାନୀ କହେ
ବଙ୍ଗଳାରେ ବାଂଲାଦେଶୀ ।
ନେପାଳ ଦେଶରେ ନେପାଳି କହନ୍ତି
ଚାଇନା ରେ ଚିନାବାସୀ ।୩।
ସମଗ୍ର ବିଶ୍ୱରେ ପ୍ରତି ଦେଶବାସୀ
ହୃଦେ ଭରା ଦେଶ ପ୍ରୀତି ।
ଭାରତରେ ରହି ଭାରତୀୟ ହୋଇ
ଜାତି ଧର୍ମ ରାଜନୀତି ।୪।
ଯେଉଁ ଦେଶ ମାଟି ପାଣି ପବନରେ
ଗଢ଼ା ଆମ ଏହି ଦେହ ।
ଧର୍ମ ନାମେ ଏଠି ଲଢେଇର ସ୍ୱର
କହି ଭିନ୍ନ ସମ୍ପ୍ରଦାୟ ।୫।
କେଉଁ ଧର୍ମ ଶାସ୍ତ୍ରେ ବର୍ଣ୍ଣିତ ହୋଇନି
ଧର୍ମ ନାମେ ହିଂସା ଗାଥା ।
ଜାତି ଧର୍ମ ନାମେ ଯୁଦ୍ଧ ବିଭୀଷିକା
ଦେଶଦ୍ରୋହୀଙ୍କର କଥା ।୬।
ଗୀତା ବାଇବେଲ କୋରାନ ଗ୍ରନ୍ଥରେ
ଧର୍ମର ମହତ ବାଣୀ ।
ଜନ ହିତ ପାଇଁ ପଥ ପ୍ରଦର୍ଶକ
ନୁହେଁ ହିଂସାର କାହାଣୀ ।୭।
ସଂପ୍ରଦାୟ ମଧ୍ୟେ ସଂଘର୍ଷର ତାତି
ଅଶାନ୍ତିର ବହ୍ନି ଜାଳି ।
ସାଂପ୍ରଦାୟିକତା ଭେଦ ଭାବ ଦଙ୍ଗା
ନିରୀହଙ୍କୁ ଦିଏ ବଳୀ ।୮।
ଗଣତନ୍ତ୍ର ଧାରା ହୋଇ ଦିଗ ହରା
ଦୁର୍ନୀତିର ବନ୍ଦୀଶାଳେ ।
ଜନ ଜାଗରଣ ପ୍ରତିକ୍ଷାରେ ବସି
ମୁକ୍ତି ଆନନ୍ଦକୁ ଭାଳେ ।୯।
ଦଳୀୟ ନୀତିରେ ଦଳ କୁଳପତି
ମନ୍ତ୍ରୀ କଟୁଆଳ ମିଶି ।
ରାଜତନ୍ତ୍ର ନୀତି ପୋଥି ଲେଖୁଛନ୍ତି
ରାଜ ଉଆସରେ ବସି ।୧୦।
ବଂଶାନୁକ୍ରମରେ ବଂଶ ଦାୟାଦର
ରାଜ ସିଂହାସନେ ଲୋଭ ।
କ୍ଷମତା ଲାଳସା ଅର୍ଥ ପିପାସାରେ
କରିବାକୁ ଚାହେଁ ଭୋଗ ।୧୧।