ଗଙ୍ଗାଠାରୁ ଗୋଦାବରୀ

ଉତ୍କଳଦିବସେ ଉତ୍କଳୀୟ ଭାଇ

    ଉତ୍କଳ କାହାଣୀ ଶୁଣ l

ଉତ୍କଳ ବିଭୂତି ନୀଳାଚଳ ପତି 

    କାଞ୍ଚିଗଲେ କରି ରଣ ll

ଜୟ ବୈଜୟନ୍ତୀ ଉଡ଼ିଲା ଭାରତେ

  ବାଜେ ଶଙ୍ଖ ଭେରୀ ତୂରୀ l

ଅଜେୟ ଉତ୍କଳ ସାମ୍ରାଜ୍ୟ ବିସ୍ତୃତ

   ଗଙ୍ଗାଠାରୁ ଗୋଦାବରୀ ll

କପିଳେନ୍ଦ୍ର ଦେବ ନୃପତି ପୁଙ୍ଗବ

   କାଶିଆ କପିଳା ଭେଟ l

ବାହମନୀ ରାଟ ହୋଇଲେ ଆକଟ

   କୃଷ୍ଣା କାବେରୀର ଘାଟ ll

ଉତ୍କଳ ସାଧବ ବାଣିଜ୍ୟ ବିଭବ

    କର୍ପୁର ଯାଇଛି ଉଡ଼ି l

କେ ପାରେ ସୁମାରି ଗାଥା ଅସୁମାରୀ

    ଉତ୍କଳୀ ହୁଅନ୍ତି ଝୁରି ll

ଆମେତ ଓଡ଼ିଆ ଭାଷା ମୋ ବଢ଼ିଆ

  ଶାସ୍ତ୍ରୀୟ ଭାରତେ ଖ୍ୟାତ l

ଆମ ଭଞ୍ଜବୀର ଆମ ବଳଦେବ

   ଶାସ୍ତ୍ରୀୟ ଓଡ଼ିଶୀ ଗୀତ ll

ଆମ ଜୟଦେବ ଶ୍ରୀଗୀତଗୋବିନ୍ଦ

     ଶୁଣନ୍ତି ଜଗତ ପତି l

ଜଗନ୍ନାଥ ଦାସ ଉତ୍କଳର ବ୍ୟାସ

   ଭାଗବତ ଭାବ ଗୀତି ll

ଝଙ୍କଡ଼ ବାସିନୀ ବାଇ ବୀଣାଧ୍ଵନୀ

   ଭାରତ ଶାରଳା ରଚି l

ପ୍ରାଦେଶିକ ଭାଷା ସେ କାବ୍ୟ ସରସା

   କିଏବା ଭାରତେ ଅଛି ll

ଉତ୍କଳୀ କୁଶଳୀ ଶିଳ୍ପ କାରିଗରି

   କୋଣାର୍କ ଅପୁର୍ବ କଳା l

ସୂଚୀମୁନେ ଗଢ଼ା ନିହାଣ ମୁଗୁରେ

   କାଳବକ୍ଷେ ଆଙ୍କିଗଲା ll

ଯହିଁ ବିରାଜନ୍ତି ମାଆ ଜଗଦ୍ଧାତ୍ରୀ

   ନାରାୟଣୀ ବିଦ୍ୟାଦାତ୍ରୀ l

ବିଦ୍ୟାର ନଗର ରାଜଧାନୀ ମୋର

  ଚୋଉଦ ଭୁବନେ ଖ୍ୟାତି ll

ଉତ୍କର୍ଷ କଳାର ମାଟିଟି ମୋହର

    ଉତ୍କଳ ନାମ ତା ଏଣୁ l

ପୋଥିଟିଏ ହେବ ଶେଷ ତା ନୋହିବ

    ଗୁଣ ବଖାଣୁ ବଖାଣୁ ll

ଉତ୍କଳର ନେତା ସ୍ଵୟଂ ନାରାୟଣ

   ଉତ୍କଳୀ ପ୍ରାଣର ପ୍ରାଣ ll

ଶ୍ରୀଜଗନ୍ନାଥଙ୍କ ଚରଣେ ଶରଣ

   ଉତ୍କଳୀର ରଖ ମାନ ll