ଘେନ ସକାଳର ସଜ ପ୍ରଣାମ
ଘେନ ସକାଳର ସଜ ପ୍ରଣାମ
ହେ ସହସ୍ରା°ଶୁ ସୂର୍ଯ୍ୟ ନାରାୟଣ
ଅରୁଣ ଉଦୀୟମାନ
ଘେନ ସକାଳର ସଜ ପ୍ରଣାମ ମୋ
ସବିନୟ ନିବେଦନ ।
ଏକାଗ୍ର ହେଉ ମୋ ଚିତ୍ତ ମନ ଧ୍ୟାନ
ପ୍ରାଣ ହେଉ ସଞ୍ଜୀବିତ
ହୃଦୟ କମଳ ହେଉ ପ୍ରସ୍ଫୁଟିତ
ସମୁଜ୍ଜ୍ୱଳ ସୁରଭିତ ।
ପ୍ରବହୁ ମଳୟ ଶାନ୍ତି ସୁଧା ନୀର
ହସି ଉଠୁ ସବୁଜିମା
ଭରୁ ଫୁଲ ଫଳେ ରଙ୍ଗ ଆଉ ରସ
ଜୀବନେ ମଧୁ ମୂର୍ଚ୍ଛନା ।
ନିର୍ଝରୁ ମମତା ସେନେହ ସୋହାଗ
ସୁମଧୁର ପ୍ରୀତି ପ୍ରେମ
ଉଲ୍ଲସୁ ପରାଣ ଆନନ୍ଦ ବିଭୋର
ମଗନ ହେଉ ତଲ୍ଲୀନ ।
ସୁକର୍ତ୍ତବ୍ୟ କର୍ମ ହେଉ ଲକ୍ଷ୍ୟ ଧ୍ୟେୟ
ଜୀବନ ହେଉ ସାର୍ଥକ
ଢାଳିଦିଅ ଶୁଭ ମଙ୍ଗଳ ଆଶିଷ
ଆଦିତ୍ୟ ସୁଖଦାୟକ ।