ରାକ୍ଷୀ ରହିଲା ସାକ୍ଷୀ

ସେନେହ ମମତା ଡୋରିରେ ଗୁନ୍ଥା

ଆମର ଏହି ପରିବାର,

ଭାଇ ମୋର ଆଜି ପ୍ରତିଜ୍ଞା କର

କରିବ ସୁରକ୍ଷା ମୋର ।

ରାକ୍ଷୀ ନୁହେଁ ଭାଇ ସୂତାଖିଅଟିଏ

ସୁରକ୍ଷା କବଚ ମୋର,

ସ୍ନେହ ଶ୍ରଦ୍ଧା ପ୍ରେମ ମନ୍ତ୍ରରେ ମନ୍ତ୍ରିତ

ମଧୁର ସମ୍ପର୍କ ଡୋର ।

ହୃଦୟ ଗର୍ଭରୁ ବିଶ୍ୱାସ ସାଉଁଟି

ଆଶାର ସଉଧ ଗଢ଼େ,

ଜୀବନ ଯାତ୍ରାରେ ସାହାସ ଭରିବ

ଏଇ ତ ପାଉଣା ଲୋଡ଼େ ।

ସୁଖରେ ଦୁଃଖରେ ପାଶେ ପାଶେ ଥାଇ

ପ୍ରେରଣା ଭରିବ ହୃଦେ,

ଅମାନିଆ ମନ ଅବାଟକୁ ଗଲେ

ଶାସନ କରିବ ପଦେ ।

ସୁନା ରୁପା ହୀରା ମୋତି ଆଭରଣ

ମାଗୁନି ଦେବାକୁ ମୋତେ,

ନାରୀର ସମ୍ମାନ କରୁଥିବ ସଦା

ଚାଲିବ ସତ୍ୟର ପଥେ ।

ମନୋବଳ କେବେ ଊଣା ନ କରିବ

ବିପଦ ଆପଦ ବେଳେ,

ଖୁସିର ଦିନକୁ ବାଣ୍ଟି ଚାଲୁଥିବ

ବନ୍ଧୁ ପରିଜନ ମେଳେ ।

ଭାଇ ଭଉଣୀର ଅତୁଟ ବନ୍ଧନ

ଅମୂଲ୍ୟ ମମତା ଝରେ,

ଅନ୍ତର ଭିତରୁ ଭାଇର ମଙ୍ଗଳ

ପ୍ରଭୁଙ୍କୁ ମାଗୁଣି କରେ l

ସେନେହ ମମତା ଡୋରିରେ ଗୁନ୍ଥା

ଆମର ଏହି ପରିବାର,

ଯେତେ ଝଡ଼ଝଞ୍ଜା ଆସୁ ପଛେ

କରିବା ସୁରକ୍ଷା ଏହାର ।