ଗାଁ ରେ ଶୀତଦିନ
ଗାଁ ରେ ଶୀତଦିନ
ଭୋର ଚାରିଟାରୁ ଉଠି
ଯିଏ ଯାହା କାମରେ ଲାଗି ଯାଆନ୍ତି
ସକାଳର ଥରୁଆ ଶୀତ ସାଥିରେ
ଶୀତଳ ଦେହକୁ ଗରମ କରନ୍ତି ।
ବୟସ ବି ହାର ମାନିଯାଏ ଗାଁ ରେ
ପରିଶ୍ରମ ଦେଖି ଗାଁ ଲୋକଙ୍କର
ଅସହ୍ୟ ଶୀତ ସାଙ୍ଗକୁ କର୍ମ ହିଁ ଧର୍ମ
ଗୁଞ୍ଜରିତ ହେଉଥାଏ ସବୁରି ଦେହର ।
ସକାଳୁ ଉଠୁ ଉଠୁ ସ୍ଥାନେ ସ୍ଥାନେ
ପସରା ମେଲିଥାଏ ନିଆଁର
ତା'ସାଥେ ନାନା ପ୍ରକାରର ଗପ
ମନକୁ କରୁଥାଏ ବିଭୋର ।
ଶୀତକୁ ଖାତିର ନ କରି ଚାଷୀ ପରିବାର
ବିଲକୁ ଯାଆନ୍ତି ସଅଳ
ଖଳାରେ ଖେଳୁଥାଏ କେତେ ପ୍ରକାର ଧାନ
ଗଡି ଯାଉଥାଏ ବେଳ ।
ରେଜେଇ ସାଥିରେ ଶୀତ ଆସର
ସାରିଯାଏ ଶୀତଦିନ
ଦେହକୁ ହିତ କୁହନ୍ତି ଜେଜେବାପା
ମନକୁ କରେ ଟାଣ ।