ଏତେ ଭଲ ତୁମେ କେମିତି ହେଲ

ଯେଉଁ ଦିନଠାରୁ ତୁମ ସହ ଭାବ

ଦେଖିଛି କେବଳ ତୁମ ସୁଗୁଣ

ଯେତେ ବି ଖୋଜିଲେ ପାଏ ନାହିଁ କେବେ

ତୁମଠାରେ ପରା ଟିକିଏ ଖୁଣ ।

ଖାଲି ମୁଁ ନୁହଁ, ଯାହା ମୁହଁ ଦେଖ

ପଢ଼ି ପାର ତୁମେ ତା'ର ହୃଦୟ

ଅପେକ୍ଷା ଶବଦ ନାହିଁ ତୁମ ପାଖେ

ଆଗଭର ପୋଛି ଦେବାକୁ ଲୁହ ।

ଆନ ଦୁଃଖେ ତୁମେ ଏତେ ଯେ ବତୁର

ଭାବିଲେ ଲାଗଇ କେତେ ଯେ ଖୁସି

ଭଲ ପାଇବାର ସଜ୍ଞାଟି କଅଣ

ତୁମଠାରୁ କେହି ଜାଣେ ଭରସି ।

ସୁଖଦୁଃଖ ଦୁଇ ସମାନ ଦେଖଇ

ସଦା ହସହସ ମୁଖ ତୁମର

ମାନଅଭିମାନ ଛୁଇଁନି ମନକୁ

ନୁହେଁ ସତେ ତୁମେ କେଡ଼େ ସୁନ୍ଦର !

ତୁମ ପାଖେ ଯେବେ ତଉଲେ ନିଜକୁ

ଭାରି ଅନୁଭବ ତୁମ ନିକିତି

ବଢେ ମୋ ଅସ୍ମିତା ଯେଣୁ ଭାବେ ବନ୍ଧା

ନଇଁ ଯାଏ ମଥା ହେ ପ୍ରିୟ ସାଥୀ !

ମନକୁ ମୋହର ପୁଚ୍ଛେ ବାରବାର

କେଉଁ ଶୁଭଲଗ୍ନେ ଜନମ ନେଲ

ଆପଣା ଅପର ନଥାଏ ବିଚାର

ଏତେ ଭଲ ତୁମେ କେମିତି ହେଲ ।