ଏମନ୍ତ ଗେରସ୍ତ କାହିଁ

ଶୁଣଶୁଣ ସାଆନ୍ତାଣୀ ଶ୍ରୀକ୍ଷେତ୍ର ଈଶ୍ୱରୀ

କି ଲୀଳା ଲଗାଇଛନ୍ତି ଲୀଳା ମୟ ହରି l

ବଡ଼ ଦେଉଳ ଗୁମୁଟେ ଅଣସରେ ଶୋଇ

ବାରବେଳା ଖାଇ ମାରୁଛନ୍ତି ସୁଖେ ହାଇ l

ଫୁଲୁରିତେଲରେ ଦଇତାଙ୍କ ଘଷାମୋଡ଼ା

ପଣ୍ଡା ପଢ଼ିଆରି ସର୍ବେ ଖାଇଲେଣି ତଡ଼ା l

ବିରୁଦ୍ଧେ ତୋ' ଚାଲି ଅଛି ବଡ଼ ଷଡଯନ୍ତ୍ର

ହଳଦୀମୁହିଁଟା କାନେ କାନେ ଦିଏ ମନ୍ତ୍ର l

ନଣନ୍ଦ ତୋହର ଅଟେ ନାଟ ଗୋବର୍ଦ୍ଧନ

ଦାନ୍ତ ନେଫେଡ଼ିି ହସନ୍ତି କାଳିଆ ବଦନ l

ଦେଢ଼ସୁରଟା ତ ତୋର କାଦମ୍ବରୀ ମତ୍ତ

ତାଙ୍କ କଥାରେ ତାଙ୍କର ହଅଁ ହଅଁ ମତ l

ଘୋଷଯାତ୍ରା କରିଯିବେ ମାଉସୀର ଘର

ତୁହି ଏକା ଜଗୁଆଳୀ ତାଙ୍କ ଶ୍ରୀମନ୍ଦିର l

ଏମନ୍ତ ଗେରସ୍ତ କାହିଁ ନଥିବ ସଂସାରେ

କୁଟ ରଚୁ ଥାଇ ପୁଣି ନିଜ ଭାରିଯାରେ l

ଏଥକୁ କରଣୀ ଯାହା ଚିନ୍ତା କରି ନେବୁ

ପ୍ରମାଦ ପଡ଼ିଲେ ଆଉ ମତେ ନକହିବୁ l

ଘରକଥା ତୋର ମାଆ କହିଲି ବୁଝାଇ

ଦୋଷକ୍ଷମା ସିନ୍ଧୁଜେମା କର ଦୟାବହି l

ଧନ୍ୟଧନ୍ୟ ମହାପ୍ରଭୂ ଧନ୍ୟ ତୁମ୍ଭ ଲୀଳା

ଘରଣୀ ତୁମ୍ଭର ପ୍ରଭୋ ଚଞ୍ଚଳୀ ଚଞ୍ଚଳା l