ଏମିତି ଜଣେ ମଣିଷ ଥିଲେ

                                         

ଇନ୍ଦୁପୁର ଗାଆଁ କେନ୍ଦ୍ରାପଡ଼ା ଜିଲ୍ଲା ମାଟିରୁ ଜନ୍ମନେଇ,

ଆଠଗଡ଼ ରାଜା ଭଣଜା ହେଲେ ବି ରହିଥିଲେ ପୁଅହୋଇ |

ମିହିର ନାମଟି ବଦଳିଲା ପୁଣି ହୋଇଲେ ସେ ନାରାୟଣ,

ରାଜାଙ୍କ ସାଙ୍ଗିଆ ସାମନ୍ତ ମିଶିଲା ପାଇଥିଲେ ଧନ-ମାନ |

କୁଜଙ୍ଗର ଜେମା ରତ୍ନମାଳି ସାଥେ ହୋଇଗଲା ବାହାଘର,

କ୍ଷମତା ସଂପତ୍ତି ଶକ୍ତି ଶାସନରେ ଥିଲା ସବୁ ଅଧିକାର |

ଗାନ୍ଧୀ ଡାକରାରେ ପିନ୍ଧିଲେ ଖଦଡ଼ କାନ୍ଧରେ ଖଦଡ଼ ମୁଣା,

ସଭିଏଁ କହିଲେ ରଜାପୁଅ ଏବେ ହୋଇଗଲେ ବାଟବଣା |

ଗଡ଼ କୁଜଙ୍ଗରେ କାଳିଆ ପାଟରେ କଲେ ଲୁଣ ସତ୍ୟାଗ୍ରହ,

ଅନ୍ୟାୟ ଅନୀତି ଶୋଷଣ ବିରୁଦ୍ଧେ ଲାଗିଥିଲେ ଅହରହ |

ଆନ୍ଦୋଳନ କରି ଫେରାଇ ଆଣିଲେ ମତ୍ସ୍ୟଜୀବୀ ଅଧିକାର,

ସମାଜ ସେବାକୁ ଆପଣେଇ ନେଲେ ନାହିଁ ସୁଖ ଦରକାର |

ଦୂରେଇ ରହିଲେ ସୁଖ-ସମ୍ପଦଠୁଁ ଦାନରେ ରଖିଲେ ମନ,

ଏରସମାଠାରେ ମାତୃଗ୍ରାମ ଗଢ଼ି ଦେଖାଇଲେ ଜାତିପ୍ରେମ |

କୁଜଙ୍ଗର ଗାନ୍ଧୀ ନାମେ ପରିଚିତ ବୀରବର ନାରାୟଣ,

ଅସହାୟ ଦୁଃଖୀ ଗରିବଙ୍କ ପାଇଁ କାନ୍ଦିଲା ତାଙ୍କର ପ୍ରାଣ |

ବିଧାନ ସଭାରେ ସଭ୍ୟ ହୋଇଲେ ସେ ନିରପେକ୍ଷ ଥିଲା ଗୁଣ,

ବାଚସ୍ପତି ପଦ ଅଳଙ୍କୃତ କଲେ ରଖି ନିଜ ଟାଣ ପଣ |

ଏମିତି ମଣିଷ ମିଳିବେ କି କାହିଁ ସବୁଥାଇ କିଛି ନାହିଁ,

ଅସଲ ମହାତ୍ମା ସଚ୍ଚା ଗାନ୍ଧିବାଦୀ ଆସିଥିଲେ ଆମପାଇଁ |

ଦିନ ଚାଲିଗଲା ସବୁ ଭୁଲିଗଲେ ଇତିହାସେ ନାହିଁ ନାମ,

ଜାତିପ୍ରେମୀ ଯେତେ ଥରେ କହିଦେବା ଧନ୍ୟ ତୁମେ ନାରାୟଣ |