ଲାଇବ୍ରେରୀ
ପ୍ରୋଫାଇଲ୍
ଏମିତି ହୁଏନି କାହିଁକି
ଏମିତି ହୁଏନି କାହିଁକି
ରାତି ପାହିଗଲେ ସୂରୁଯକୁ ଖୋଜେ
ହେଲେ ମୁଁ ଖୋଜଇ କାହିଁକି
ତା' ପରି ଆଲୋକ ବୁଣି ଦେବା ପାଇଁ
କେହି ଆଉ ସତେ ନାହିଁକି
ଖୋଜେ ଲହରୀକି ସାଗର କୂଳରେ
ହେଲେ ମୁଁ ଖୋଜଇ କାହିଁକି
ତା' ପରି ଅଧିର ଅତି ମନୋହର
କେହି ଆଉ ସତେ ନାହିଁକି
ପୁନେଇଁ ରାତିରେ ଖୋଜେ ଜହ୍ନଟାକୁ
ହେଲେ ମୁଁ ଖୋଜଇ କାହିଁକି
ତାହା ପରି ଶୁଭ୍ର ଶୀତଳ ଜୋଛନା
ସତେ କେହି ଦିଏ ନାହିଁକି
ଖୋଜେ କୋଇଲିକି ବସନ୍ତ ଆସିଲେ
ହେଲେ ମୁଁ ଖୋଜଇ କାହିଁକି
ମିଠା ମିଠା ସୁରେ ଗାଇବାକୁ ସତେ
ତାହା ପରି କେହି ନାହିଁକି
ଖୋଜେ ମାଆ କୋଳ କି ସଂଜ ସକାଳ
ହେଲେ ମୁଁ ଖୋଜଇ କାହିଁକି
ଯେଉଁ ସୁଖ ଶାନ୍ତି ମିଳେ ତହିଁ ନିତି
ଆଉ କାହିଁ ମିଳେ ନାହିଁକି
ଦିଅଁ ଖୋଜେ ଯେବେ ଦେଉଳକୁ ଆସେ
ହେଲେ ମୁଁ ଖୋଜଇ କାହିଁକି
ସେ ଯେମିତି ବୁଝେ ହୃଦୟର କଥା
ଆଉ କେହି ବୁଝେ ନାହିଁକି
ସତେ ଏମିତିକା ଭଲ ଗୁଣ କିଛି
ନିଜ ଠାରେ କିବା ନାହିଁକି
ନିଜକୁ ଖୋଜିବା ଖୋଜିକି ପାଇବା
ଏମିତି ହୁଏନି କାହିଁକି
