ଏକତା ବର୍ଦ୍ଧକ

ରାମାୟଣ ଉପରେ ପାରାୟଣ

ପ୍ରବଚନ ଚାଲିଥିଲା

ମୂଖ୍ୟବକ୍ତା ପଣ୍ଡା ନାରାୟଣ

ବାଣୀକଣ୍ଠରୁ ଝରୁଥିଲା 

ସମବେତ ଶ୍ରୋତା ଜନତା

ଆବାଳ ବୃଦ୍ଧ ବନୀତା

ପିଇ ଯାଉଥିଲେ ନୀରବେ

ଡାକବାଜି ଯନ୍ତ୍ର କରତା ।

ଉପମା ଉପମେୟ ମଣ୍ଡିତ ଭଙ୍ଗେ

 ଶବ୍ଦ-ପଦ-ଛନ୍ଦ ମିଶ୍ରିତ 

ଲଳିତ ମଧୁର ରସ ସ୍ନିଗ୍ଧ ଉମଙ୍ଗେ

ଅମୃତ ବାଣୀ ନିସୃତ ।

ଏକା ଏକା ହେଲେ ପାଣି ବୁନ୍ଦା

ଟୋପା ଟୋପାରେ ସିମୀତ

ମିଶିଗଲେ ସାଙ୍ଗରେ ସାଗର

 ମହାସାଗର ନାମରେ ବିଦିତ ।

ଗୋଟେ ଗୋଟେ ଅଲଗା ରହିଲେ

ସୂତା ଖିଅରେ ହେବ ଟଣା

ସାଥିରେ ମିଶିଲେ ପୁଣି ବୁଣିଗଲେ

ଗାମୁଛା ଚାଦର ଶାଢୀରେ କିଣା ।

ଫର୍ଦ୍ଦ ଫର୍ଦ୍ଦ ହେଲେ ଖୋଲା କାଗଜ 

ଟୁକୁରା ମୁକୁରା ଛିଣ୍ଡା ଚଉତା

ମିଶିଗଲେ ସବୁ ସାଙ୍ଗରେ ସାଥିରେ

ପୁସ୍ତକ ନାମରେ ସର୍ବବିଦିତା ।

ଗୋଟିଏ ବାଡିକୁ ଦ୍ଭାଙ୍ଗିହେବ 

ଅତି ସହଜରେ ଭାଇ

ସବୁ ବାଡି ମିଶିଗଲେ ଜାଣ

ହେବ ନାହିଁ ବଙ୍କେଇ ।

ଏକତା ହିଁ ଜନ-ବଳ ବର୍ଦ୍ଧକ 

ସମାନତା ପରିଚାୟକ

ସଭିଙ୍କୁ ଗୁନ୍ଥିଲେ ସୂତାଖିଅକ

ଗୀତ ମୀତ ଆମୋଦଦାୟକ ।