ଲାଇବ୍ରେରୀ
ପ୍ରୋଫାଇଲ୍
ଏକ ଠିକଣାର ସନ୍ଧାନ
ଏକ ଠିକଣାର ସନ୍ଧାନ
1 min
172
କିଛି ମିଛକୁ ସତ ଭାବି
କିଛି ଅବିଶ୍ଵାସକୁ ବିଶ୍ଵାସ ଭାବି
କିଛି କୋହକୁ ଆପଣାର ଭାବି
ସେ ସବୁକୁ
ଚୁଲିରେ ବସିଥିବା ଭାତ ହାଣ୍ଡିର
ଫୁଟନ୍ତା ପେଜ ସହିତ ଉଗାଳି ଦିଏ।
କିଛି ଭାବନାକୁ ସମ୍ଭାବନା ଭାବି
କିଛି ଯାତନାକୁ ପ୍ରାପ୍ୟ ଭାବି
କିଛି ସ୍ଵପ୍ନକୁ ଜୀବନର ଦୁଃସ୍ଵପ୍ନ ଭାବି
ନିଜର ଦରସିଆଁ ପଣତରେ
ଲୁଚେଇ ପକାଏ ।
କିଛି ପରିସ୍ଥିତିକୁ ସଂଘର୍ଷ ଭାବି
କିଛି ଅପମାନକୁ ଦୁଃସମୟ ଭାବି
କିଛି ଅଭିମାନକୁ ନିଜର ଭାଗ୍ୟ ଭାବି
ପରିଜନଙ୍କ ଓଠରେ ହସର
କଳିକା ଫୁଟାଇବାକୁ ଚାହେଁ।
ନିଜର କର୍ତ୍ତବ୍ୟ ଦାୟିତ୍ଵର
ପରିବେଷ୍ଟନୀରେ ସଜେଇ ଥିବା
ଗୃହ ଯେବେ ତା' ପାଖରେ ଋଣୀ
ବୋଲି ଗୃହିଣୀ କୁହାଯାଏ।
ତାହେଲେ ଏ ଦ୍ଵିଧା କାହିଁକି
ଯେ ପ୍ରକୃତରେ ତା' ଠିକଣା କଣ?
ତାହେଲେ ଏ ସମ୍ପର୍କରେ
ଏତେ ଅନ୍ତର କାହିଁକି?
ଦୁହିତାର ନାମକରଣ ହୁଏ ସିନା
ହେଲେ କିଏ କହେ ପରଧନ
ଆଉ ପୁଣି କିଏ ପରଝିଅ!
