ଏହା ତ ଜରୁରୀ ନୁହେଁ

ତୁମ ପାଇଁ ଉଇଁ ଆସିବ ପ୍ରାଚୀ ଉହାଡ଼ରୁ ନୂଆ ସୂର୍ଯ୍ୟଟିଏ

ରଜନୀ ପାହିବା ଆଗରୁ, ଏହା ତ ଜରୁରୀ ନୁହେଁ !

ସବୁ ରାତି ଯେ ଶୋଇଯିବ ନିଦ ସ୍ୱପ୍ନ ଓ ଆଶ୍ୱସ୍ତିର ଚାଦର ତଳେ

କ୍ଳାନ୍ତି ଯେତେ ମେଣ୍ଟିବା ଆଗରୁ, ଏହା ତ ଜରୁରୀ ନୁହେଁ !

ସବୁ ସ୍ୱପ୍ନ ପକ୍ଷଯୁକ୍ତ ହୋଇ ଉଡ଼ିଯିବେ ସ୍ୱକଳ୍ପିତ ରଙ୍ଗୀନ ଆକାଶକୁ

ତୁମ ହାତ ଧରି ନେଇ ଧୀରେ, ଏହା ତ ଜରୁରୀ ନୁହେଁ !

ଆଶାର ଆୟୁଷ ରେଖା ଲମ୍ବିଯିବ ଅଚିହ୍ନା ଦିଗନ୍ତ ପର୍ଯ୍ୟନ୍ତ

ନୂଆ ଇତିହାସ ଲେଖିବା ଲକ୍ଷ୍ୟରେ, ଏହା ତ ଜରୁରୀ ନୁହେଁ !

ସୁଖର ଏ ଅହଙ୍କାର ଆଜି ଯିଏ ହୃଦାଚଳେ କରୁଥାଏ ଦୀର୍ଘ ଅଟ୍ଟହାସ୍ୟ

କରୁଥିବ ଅନନ୍ତ ଶାସନ, ଏହା ତ ଜରୁରୀ ନୁହେଁ !

ଦୁଃଖର ଏ କଳାପାଣି ସୀମାବଦ୍ଧ କରିନେବ ତୁମ ନିୟତି ରେଖାକୁ

ଭାଙ୍ଗିଦେଇ ଶେଷ ସ୍ୱାଭିମାନ, ଏହା ତ ଜରୁରୀ ନୁହେଁ !

ସବୁଥର ପରି ନିଜ ମିଛ ଯୁକ୍ତି ସବୁକୁ ସାବ୍ୟସ୍ତ କରି ପାରିବ

ତୁମ ବେଢଙ୍ଗ ଉପାୟ ମାନରେ, ଏହା ତ ଜରୁରୀ ନୁହେଁ !

କିଛି ପ୍ରାପ୍ତି ଲାଳସାରେ ଯାଚିଥିବା କିଛି ନକଲି ଭାବନାର ମୂଲ୍ୟ

ତୁମ ପାଶେ ଫେରିବ ଅଚିରେ, ଏହା ତ ଜରୁରୀ ନୁହେଁ !

ସକାଳର ଚିକମିକ ଖରାର ଭାଗ୍ୟରେ ଯେ ମେଘୁଆ ମଧ୍ୟାହ୍ନ ନଥିବ

ତୁମ ନିର୍ଭୁଲ ଗଣନା ପରେ, ଏହା ତ ଜରୁରୀ ନୁହେଁ !

ତୁମ ଉପହାସ ପରିହାସ ଓ ତାଚ୍ଛଲ୍ୟର ଉକ୍ତି ଶୁଣି ସାମ୍ନାବ୍ୟକ୍ତି

ହସିଦେବ ହର୍ଷ ହୃଦୟରେ, ଏହା ତ ଜରୁରୀ ନୁହେଁ !

ତୁମ ଯୋଜନାରେ ସହଭାଗୀ ହୋଇ ଜୀବନ ଯେ ଚାଲୁଥିବ

ତୁମ ସହ ହାତ ଛନ୍ଦି ଦେଇ, ଏହା ତ ଜରୁରୀ ନୁହେଁ !

ନିୟତିକୁ ନିନ୍ଦିଚାଲି ନିଜେ ଦୋଷମୁକ୍ତ ହେଲେ ବଦଳି କି ଯିବ

ତୁମ ଛାଇ ଶ୍ବେତରଙ୍ଗ ହୋଇ, ଏହା ତ ଜରୁରୀ ନୁହେଁ !