ଦୁନିଆ କହୁଛି

ଦୁନିଆ କହୁଛି

*************

ତୁମେ ବଞ୍ଚିବା ଶିଖିଛ 

ଲୁହକୁ ଆପଣାର କରି 

କିଛି ଟୋପା ଲୁହ ପିଇ 

କିଛି ଟୋପା ଲୁହ ଢାଳି |

 

ତୁମେ ମୋତେ ହସାଇଛ 

ନୂଆ ଦୁନିଆ ବି ଦେଖାଇଛ 

ଅଥଚ ତୁମ ଲୁହର ମୂଲ ନବୁଝି 

ଦୁନିଆ କରୁଛି ମୋ ହସର ମୂଲ|

 

କିଏ ବା କେମିତି ଜାଣିବ

ମୋ ଓଠର ପ୍ରତିଟି ହସରେ 

ତୁମ ଲୁହ ହିଁ ରହିଛି 

ଜୀବନବ୍ୟାପି ଏ ସାଧନାକୁ 

ତୁମ ଜୀବନର ଏ ଉତ୍ସର୍ଗ କୁ 

ତୁମେ ହାରିଗଲ ହାରିଗଲ ବୋଲି 

ଏବେ ଦୁନିଆ କହୁଛି |

 

ଦୁନିଆ ବୁଝୁ କି ନବୁଝୁ 

ଲୁହର ମୂଲ ମୁଁ ବୁଝିଛି 

ତୁମ ଆଖିର ଲୁହ ସବୁ ମୁକ୍ତାପରି

ମୋ ହୃଦୟରେ ସାଇତା ରହିଛି |

ତୁମ ଲୁହଧାର ଏକ ନଈ 

ସେ ନଈରେ ମୋ ମନର 

ସବୁ ଆବର୍ଜନା ଯାଇଅଛି ବୋହି |

 

ମୋ ସୁଖ ଦେଖିବା ପାଇଁ 

ମୋ ଜୀବନକୁ ଗଢି ଦେଲ

ତୁମ ଜୀବନକୁ ଜାଳିଦେଲ ସଳିତା କରି,

ଲୁହରେ ଲୁହରେ ଲହୁ ଢାଳି 

ହୃଦୟରେ ସବୁଦିନ ରହିଗଲ

ପୂଜା ଫୁଲଟିଏ ହୋଇ|

 

ତୁମେ ମୋର ପ୍ରୀତି ଫୁଲ 

ଜୀବନର ଚମ୍ପାଫୁଲ 

ଆଖିର ସ୍ବପ୍ନ ମୋର 

ମୋ ଆକାଶର ଜହ୍ନ |

ତୁମ ବିନା ବଞ୍ଚିବା ଶିଖି ନାହିଁ 

ମରିବା ବି ଜାଣି ନାହିଁ 

ପ୍ରାଣର କପୋତୀ ମୋର 

ଏକା ଏକା ଲୁହ ଢାଳ ନାହିଁ 

ତୁମେ ଅଛ ମୋ ଛାତି ତଳେ 

ମୋ ହୃଦୟ ଝୁରୁଛି ନିତି|

 

ଏ ଦୁନିଆ ଦେଖେନା କେବେ 

କାହା ଲୁହର ଉଜାଣି ଯମୁନା 

ବୁଝେନା କେବେ ବି 

କାହାର କେତେ ଯେ ବେଦନା |

 

ଜାଣିଛି ସାଗର ଠିକଣାରେ 

ତୁମେ ଏକ ଲୁହମତି ନଈ 

ତୁମ ଲୁହ ସବୁ କହେ 

ହସ କାନ୍ଦ ଜୀବନର କଥା 

ବୁଝିପାରେନି କିନ୍ତୁ ଦୁନିଆ 

ପ୍ରେମର ଏ ସବୁ ନିରବ ଭାଷା |

 

ଲୁହ ସବୁ ମୁକ୍ତା ହୋଇ 

ମୋ ପାଇଁ ଝରିଛି 

ଦୁନିଆ କିଛି ନବୁଝି 

ସେ ହାରିଗଲା ହାରିଗଲା କହୁଛି 

ଅସଲରେ ମୋ ଜିତିବାରେ 

ତାଙ୍କର ହିଁ ଜିତ ହୋଇଛି |

*********************