ଦୁଇ ମଦୁଆ

ଦୁଇ ମଦୁଆ ସାଙ୍ଗ ଭଳିଆ

ମଦ ପିଉଥିଲେ ବସି

ଚାଖେଣି ସହ ଲଗାଇ ମୋହ

ମନେ ପାଇଲେ ଖୁସି ।।

ରଙ୍ଗିନ ପରା ଦୁନିଆଁ ସାରା

ଗଗନେ ଉଡେ ମନ

ଖାଲ ଢିପଟି ସମାନ ଭାବି

ପାଦ ପକାନ୍ତି ଜାଣ ।।

ବାଟ ଅଣ୍ଡାଳି ଚାଲନ୍ତି ଢଳି

ପାଟିକୁ ନାହିଁ ବେଳ

ସତେ କି ସିଏ ଜିଣି ଅଇଲେ

ଯୁଦ୍ଧେ ସରଗ ପୁର ।।

ରାସ୍ତାରେ ଯାନ୍ତି କା"କୁ ବକନ୍ତି

ଠିକଣା କିଛି ନାହିଁ

ଆଲୁଅ ବାଟ ଅନ୍ଧାର ଦିଶେ

ଯାନ୍ତି ଅଣ୍ଡାଳି ହୋଇ ।।

ରାସ୍ତାରେ ପୂଳେ ଗୋବର ଦେଖି

ଗୋଟେ ମଦୁଆ କୁହେ

ଅଫିମ ପୁଳେ ପାଇଛି ମୁହିଁ

ମୋ ଭଳି କେହି ନୁହେଁ ।।

ଆର ମଦୁଆ ହୋଇଲା ଠିଆ

ଲୋଭ ଲାଗିଲା ତାକୁ

ଅଫିମ ଜାଣି ପାଟିରେ ପଣି

କରଇ ଚାକୁ ଚାକୁ ।।

ରାଗି କହିଲା ପାଗଳା ପରା

ତୋ ପରି କେହି ନାହିଁ

ଗୋବର ଧରି ଅଫିମ କହୁ

ନିଶାରେ ବାୟା ହୋଇ ।।