ଦୁହିତା

 ଅଲିଅଳି କନ୍ୟା ପିତା ମାତାଙ୍କର 

ସ୍ନେହ ମମତାରେ ଋଣୀ, 

ଆଉ କାହାଘର ଶୋଭିତ ମଣ୍ଡନେ 

ବଧୂବେଶ ସାଜେ ପୁଣି |

ଗେଲବସରରେ ବଢିଥାଏ ସିନା 

କେତେ ଆଶା ମନେ ବୁଣି, 

ନୂଆ ପରିବାର ନୂଆ ସମ୍ପର୍କକୁ 

ଏକସୂତ୍ରେ ବାନ୍ଧେ ପୁଣି |

ସଂସ୍କାରେ ଶୋଭିତ ଗୌରବ ମଣ୍ଡିତ 

ସ୍ରୋତସ୍ୱିନୀ ନଦୀଟିଏ, 

ସଂସାର ନଦୀର ଜୁଆର ଭଟ୍ଟାକୁ 

ପ୍ରେମରେ ଶାନ୍ତ କରାଏ |

ଦୁଇକୁଳ ପାଇଁ ସମ୍ପର୍କର ସେତୁ 

ମଜବୁତ ପାଇଁ ସିନା, 

ଦୀପରେ ସଳିତା ପରି ଜଳୁଥାଏ 

ଅନ୍ୟକୁ ଦେଇ ସାନ୍ତ୍ୱନା |

ଦୁହିତା ଜନମ ଦୁଇ କୁଳପାଇଁ

ହିତ ସାଧନ ସେ କରେ,

ସୁଖ,ଦୁଃଖ ଭୁଲି ସମର୍ପଣ ଭାବେ

ତ୍ୟାଗରେ ସବୁ ଆଦରେ |

ନିଜ ପରିବାର ସୁଖ ସୁବିଧାକୁ 

ସଦା ରଖିଥାଏ ଧ୍ୟାନ, 

କୁଳବଧୂ ରୂପେ ପରିଚୟ ତାର 

ଉତ୍ସର୍ଗୀକୃତ ଜୀବନ |