ଦୃଶ୍ୟପଟ୍ଟ

ଦୃଶ୍ୟପଟ୍ଟେ ନର୍ତ୍ତନେ ଆସେ କେତେ ଛବି

    ବଦଳାଏ ପ୍ରତିନିତି କେତେ ଭାଗ୍ୟରବି

   ସୃଷ୍ଟିର ସେ ଏ କି ବିଡମ୍ଵନା

କିଏ ହସେ କିଏ କାନ୍ଦେ ହୋଇ ଆନମନା ।

ସ୍ଵେଦାକ୍ତ କଣିକା ତଳେ ମହୁଆ ସେ ଗନ୍ଧ

  ଚିରାଫଟା ବାସ ତଳେ ତା ' ଦେହ ଅଳିନ୍ଦ

     କସରତ କରୁଥାଏ ମୂଲ

ଖାଦ୍ୟ, ବସ୍ତ୍ର ,ବାସ ସାଥେ ବାୟୁ ଆଉ ଜଳ ।

ମତ୍ସ୍ୟଜୀବୀ ପେଟ ପାଇଁ ଗଳି ପରେ ଗଳି

     ବିଚରଇ ଫେରିବାଲା ଦ୍ଵାର ଦ୍ଵାର ବୁଲି

   କଣ୍ଡକ୍ଟର ଛାଡଇ ବୋବାଳି

କିଏ ଦିଏ ଯାତ୍ରା ମୂଲ କିଏ କରେ କଳି ।

ଦରହାସ ମୁଖ ତଳେ କୋହଫଟା ହୃଦ

    ଆବେଗର ଆବେଶର ଆଶ୍ଳେଷର ବଦ୍ଧ

     ଆଖି ଯାଏ ପହଁରି ପହଁରି

ମିଳିବକି କେଉଁଠାରୁ ଟୋପେ କୃପାବାରି ।

ମଜୁରିଆ ଖଟିଖିଆ ଚଷାର ପରାଣ

   ସନ୍ତୁଳିତ ଜୀବନର ସଂଘର୍ଷେ ବିଲୀନ

       ଅସହଣି ଜୀବନର ବୋଝ

ବୋହି ବୋହି ତନୁମନ ହୁଏ ଅସହଜ ।

ବିଭାଘର ବ୍ରତଘର ପାଠପଢା କାହୁଁ

   କରିବାକୁ ଅଛି ବେଳ ଦାଣ୍ଡେ ଠିଆ ସାହୁ

    ସୃଷ୍ଟିର ସେ ଏ କି ବିଡମ୍ଵନା

ପେଟ ପାଇଁ ଦାନା ମୁଠେ ଲାଜ ପାଇଁ କନା ।