ଦୋଳ ପୂର୍ଣ୍ଣିମା
ଦୋଳ ପୂର୍ଣ୍ଣିମା
ଭକ୍ତିର ଠାକୁର ଅପୂର୍ବ ସୁନ୍ଦର
ଅଦ୍ଭୁତ ତୁମର ଲୀଳା
ଛାଡି ଶ୍ରୀମନ୍ଦିର ଦର୍ଶନେ ଭକ୍ତର
ତେର ପର୍ବେ ଲୀଳାଖେଳା ll
ବସନ୍ତ ଋତୁରେ ରଙ୍ଗର ଖେଳରେ
ଫଗୁଣରେ ଫଗୁଖେଳ
ଫଗୁ ଦଶମୀରେ ପବିତ୍ର ତିଥିରେ
ଆରମ୍ଭ ଅବିର ଖେଳ ll
ଧର୍ମର ସ୍ଥାପନ ମର୍ତ୍ତ୍ୟରେ ଜନମ
କୃଷ୍ଣ ରୂପେ ଜନମିଲ
ପୁତନା ରାକ୍ଷସୀ ବର୍ବର ସେ କଂସ
ଭ୍ରଷ୍ଟାଚାର ନାଶ କଲ ll
ଉତ୍ସବ ପାଳନ ସରାଗ ମିଳନ
ଗୀତ ଵାଦ୍ୟେ ନାଚ ପାଲା
ରାଧା କୃଷ୍ଣ ପ୍ରେମ ଶାଶ୍ୱତ ଦର୍ଶନ
ଦୋଳ ପରବର ଲୀଳା ll
ରଙ୍ଗ ମାରି ଦେହେ ଶୀତ ମଳି ଧୋଏ
ପରମ୍ପରା ଖେଳ ହୋଲି
ଗୋପାଳ ଜାତିର ପୂଣ୍ୟ ଐତିହ୍ୟର
ଲଉଡ଼ି ଖେଳରେ ମେଳି ll
ଫଗୁଣ ପୂର୍ଣ୍ଣିମା ଆନନ୍ଦରେ ଭରା
ପ୍ରଭୁ ଯେ ବିମାନେ ଝୁଲେ
ନୂତନ ବରଷ ପଞ୍ଜିକା ପ୍ରକାଶ
ପ୍ରକୃତିର ମହାକୋଳେ ll
ନବ ପଲ୍ଲବୀତ ଆମ୍ବର ସୁଆଦ
ପ୍ରସ୍ଫୁଟିତ ନାନା ଫୁଲ
ଦର୍ଶନ ପୃଥିବୀ ପ୍ରଭୁଯେ କରନ୍ତି
ପ୍ରକୃତି ପୁରୁଷ ମେଳ ll
ହୋଲିକା ଦହନ ମେର୍ଦ୍ଧାସୁର ହତ
ପାପ ହ୍ରାସ ଧରା ହେଲା
କାମ ଦହନରେ ଶିବଙ୍କ କୋପରେ
କାମଦେବ ଭସ୍ମ ଗଲା ll
ଜନ୍ମ କାର୍ତ୍ତିକେୟ ପୁରାଣ ବିଷୟ
ଈଶ୍ୱର ନିର୍ଦ୍ଦେଶ ଥିଲା
ତାରକା ଅସୁର ପାଇଁକି ନିଧନ
ଅଲୌକିକ ହୋଇଥିଲା ll
ଶିବ ବିଷ୍ଣୁ ଭକ୍ତ ସର୍ବେ ଆନନ୍ଦିତ
ହୋଲିରେ ଅବିର ଖେଳେ
ବିଜୟ ଉତ୍ସବ ବିନା ଅଂହ ଗର୍ବ
ସାଙ୍ଗ ସାଥି ବନ୍ଧୁ ମେଳେ ll
ଆଜିର ସ୍ମାରକୀ ଜଗନ୍ନାଥ ସ୍ୱାମୀ
ପୁରୀରେ ଚାଚେରୀ ଲୀଳା
ଚାଚେରୀର ବେଶେ ଦୋଳେ କରି ବିଜେ
ଦର୍ଶନ ଦିଅନ୍ତି ଭଲା ll
ପାର୍ବତୀ ଶଙ୍କର ରାଧାକୃଷ୍ଣଙ୍କର
ପୁରେ ପୁରେ ଯାତ୍ରା ଦୋଳ
ଭୋଗଯେ ଆରିସା କୋରା ଖଇ ଗଜା
ଘଣ୍ଟ ଘଣ୍ଟା ବାଜେ ଖୋଳ ll