ଦେଖୁଛି ଯାହା ଲେଖୁଛି

କୁହାଯାଏ ଜ୍ଞାନୀ-ଗୁଣୀ-ପଣ୍ଡିତଙ୍କୁ ପୁରସ୍କାର ଦିଆଯାଏ,

ଦେଖୁଛି ଏ' ଆଖି ଜଣେ ବିକେ ପୁଣି ଆଉ ଜଣେ କିଣିନିଏ |

କୁହାଯାଏ ଧନୀଲୋକ କିଛି ଧନ ଗରିବକୁ କରେ ଦାନ,

ଦେଖୁଛି ଏ' ଆଖି ଗରିବକୁ ଧନୀ କରେ ବେଶି ହୀନିମାନ |

କୁହାଯାଏ ଏଇ କଲେଜରେ ପଢ଼ ଆଗକୁ ଚାକିରୀ ଥୁଆ,

ଦେଖୁଛି ଏ' ଆଖି ପାଠପଢା ପରେ ଛାତ୍ର ହେଉଛି ଭକୁଆ |

କୁହାଯାଏ ଜାତି-ଜାତକ ମିଳେଇ କରୁଥିବ ବାହାଘର,

ଦେଖୁଛି ଏ' ଆଖି ସବୁ ତ ନକଲ ମିଛ ପ୍ରମାଣ ପତର |

କୁହାଯାଏ ସତ୍ୟ-ଧର୍ମ ପଥେ ଥିଲେ ବିପଦ ଆସିବ ନାହିଁ,

ଦେଖୁଛି ଏ' ଆଖି ସତ୍ୟର ପୂଜାରୀ ଥାଏ ଦୁଃଖ-କଷ୍ଟ ପାଇ |

କୁହାଯାଏ ପୁଅ କୁଳର ପ୍ରଦୀପ ତୁଣ୍ଡେ ଦେବ ଗଙ୍ଗାଜଳ,

ଦେଖୁଛି ଏ' ଆଖି ବୁଢା-ବୁଢୀମାନେ ମରନ୍ତି ହେଇ ବିକଳ |

କୁହାଯାଏ ଧନଠାରୁ ଜ୍ଞାନ ବଡ଼ ସବୁଠାରୁ ବଡ଼ ମାଆ,

ଦେଖୁଛି ଏ' ଆଖି ଧନଥିଲେ ମନ କରୁଛି ତା' ଇଚ୍ଛା ଯାହା |