ଦେ ରଙ୍ଗ ପ୍ରେମର
ଦେ ରଙ୍ଗ ପ୍ରେମର
ରଙ୍ଗ ଯଦି ଦେବୁ ମୋତେ
ଦେ ରଙ୍ଗ ପ୍ରେମର
ଦୁନିଆ ତ ଦେଖେ ଦେହ, ରଙ୍ଗେଇ ଦେ ଅନ୍ତର
ସ୍ନେହ ରଙ୍ଗେ ଭିଜା ମୋତେ ଏମିତି....
ବିନ୍ଦୁଠୁଁ ସିନ୍ଧୁ ହୋଇ ଭେଦିଯିବି ଅମ୍ବର
ଜ୍ଞାନେ ଭରି ପିଚକାରୀ ଦେ ମୋତେ ଗାଧୋଇ
ଆଠଶକ୍ତି, ସାତଗୁଣେ ଦେ ଆଜି ସଜେଇ
ମଥାରେ ତିଳକ ଶୋହେ ପବିତ୍ର ଏ ବ୍ରତର
ରଙ୍ଗ ଯଦି ଦେବୁ ମୋତେ ଦେ ରଙ୍ଗ ପ୍ରେମର
ରଙ୍ଗ ଏଠି ବଣ୍ଟା ଶ୍ୱେତ, ସବୁଜ ଓ କେଶରୀ
ସୂରୁଜ ଚାନ୍ଦ ବଣ୍ଟା, ପରିଚୟ ପାଶୋରି
ସ୍ମୃତି ରଙ୍ଗେ ଦୂର ହେଉ ଦୂରତା ଏ ମନର
ରଙ୍ଗ ଯଦି ଦେବୁ ମୋତେ ଦେ ରଙ୍ଗ ପ୍ରେମର
ସୁଖ, ଶାନ୍ତି, ସ୍ନେହ, ପ୍ରେମ, ଆନନ୍ଦ ଓ ଶରଧା
ଖୋଜେ ଆଜି ପ୍ରତି ପ୍ରାଣ, ପ୍ରକୃତି ଓ ବସୁଧା
ଭୁଲି ମାନ ଅଭିମାନ, ସଭିଁଏ ମୋ ନିଜର
ରଙ୍ଗ ଯଦି ଦେବୁ ମୋତେ ଦେ ରଙ୍ଗ ପ୍ରେମର