ଡେଙ୍ଗା ମଣିଷ

ଠେଙ୍ଗା ପରି ସିଏ ଡେଙ୍ଗା ମଣିଷଟେ

ନାଆଁ ତା ବିଜୁ ଦୁର୍ଦ୍ଦଣ୍ଡ

ଖାରବେଳ ସିଏ ନବ ଉତ୍କଳର

ଦୁର୍ଦ୍ଦଷ କଳିଙ୍ଗ ଷଣ୍ଢ l

ମହା ବୈମାନିକ ସେ ନୁହେଁ ନାୟକ

ଅଟେ ସେ ପଟ୍ଟନାୟକ

ନୋବେଲ ସମ୍ମାନ ପାଇ ନାହିଁ ସିନା

ନୋବେଲର ସଂସ୍ଥାପକ l

କଳିଙ୍ଗ ସମ୍ମାନ ଉତ୍କଳ ନୋବେଲ

ଖ୍ୟାତ ବିଶ୍ୱ ଦରବାରେ

ବିଜୁ ଚାଚାଙ୍କର ବିଜ୍ଞ ସୃଷ୍ଟି ଏହି

ଜ୍ଞାନୀ ଗୁଣି ଚିହ୍ନିବାରେ l

ଇଣ୍ଡୋନେସିଆରେ ବିଦ୍ରୋହୀ କବଳେ

ଶୂକର୍ଣ୍ଣ ପ୍ରାଣ ଉଚ୍ଛନ୍ନ

ଛଞ୍ଚାଣ ପରାୟେ ଝାମ୍ପି ଘେନିଗଲେ

ଚାଳି ପୁଷ୍ପକ ବିମାନ l

କାଶ୍ମିରୀ ଘାଟିରୁ ଉଠାଇ ଆଣିଲେ

କେତେ କେତେ ଶରଣାର୍ଥୀ

ଇଣ୍ଡୋନେସିଆର ଭୂମି ପୁତ୍ର ପୁଣି

ନାମ ଦେଲେ ମେଘାବତୀ l

ଓଡ଼ିଶା ମାଟିରେ ଚାଲେ ଆଜି ପୁଣି

କେତେ କଳ କାରଖାନା

ହୀରାକୁଦ ବନ୍ଧ ପାରାଦ୍ୱୀପ ନ୍ୟାସ

ବିଜୁର ସିନା କଳ୍ପନା l

କାଲାମ ଦ୍ବୀପରୁ ମିସାଇଲ ମାନ

ଆକାଶରେ ଯାଏ ଉଡ଼ି

କାଲାମଙ୍କୁ ଦେଇ ହୁଇଲର ଦ୍ବୀପ

ବିଜୁ ଆଣିଥିଲା ଭିଡ଼ି l

ଜନମରୁ ନେତା ସେହି ଜନନେତା

ଏ ଜାତି ମହା ନାୟକ

କଟକରୁ ପେଶାୱାର ପିଲା ଦିନେ

ସାଇକେଲର ଚାଳକ l

ବିଜୟାନନ୍ଦ ସେ ବିଜୁ ଚାଚା ଆମ

ପଟ୍ଟ ନାୟକ ଆମର

ଆହେ ତୁଙ୍ଗ ନେତା ଜାତିର ନିର୍ମାତା

ଘେନ ଜାତି ନମସ୍କାର l