ଦାୟିତ୍ୱ

ମାନବ, କୀଟପତଙ୍ଗ, ପଶୁପକ୍ଷୀ

ମାତୃତ୍ବ ପ୍ରେମେ ସନ୍ତାନେ,

ଦାୟିତ୍ୱ ପାଳନ୍ତି ନିଜ ନିଜ ଧର୍ମେ

ସୃଷ୍ଟିର ରକ୍ଷା କାରଣେ,

ବସୁଧା ବି ତା' ପାଳନେ,

ଦାୟିତ୍ୱ ନିଭାଏ ସର୍ବେ ସର୍ବ ଦେଇ

ନିଃସ୍ବାର୍ଥ ପ୍ରେମ କାରଣେ ।

ପିତା, ମାତା, ଭାଇ, ଭଗ୍ନୀ ପରିବାରେ

ପରସ୍ପରେ ରଖି ପ୍ରୀତି,

ନୀତିନିୟମରେ ବାନ୍ଧିହୋଇ ସର୍ବେ

ନିଜ ଦାୟିତ୍ୱ ପାଳନ୍ତି,

ରଖି ହୃଦେ ସ୍ନେହ, ଭକ୍ତି,

ନିଜ ନିଜ ସମ୍ପର୍କର ସୂତ୍ରଟିକୁ 

ଦୃଢ଼ କରି ଧରିଥା'ନ୍ତି ।

ପରିବାର, ଗ୍ରାମଠାରୁ ଦେଶେ ସର୍ବେ

ଶୃଙ୍ଖଳେ ଅନୁବନ୍ଧିତ,

ହୋଇ ନିଜ ନିଜ ଦାୟିତ୍ୱରେ ସଦା

ଥାଆନ୍ତି କର୍ତ୍ତବ୍ୟରତ,

ନିଜ କର୍ମେ ଅଭିପ୍ରେତ,

ହୋଇ ବାଣ୍ଟି ଚିଲିଥାଆନ୍ତି ସକଳେ

ମିଳେ ଯାହାକୁ ଯେମନ୍ତ ।

ସୂର୍ଯ୍ୟ, ଚନ୍ଦ୍ର, ତାରା ନିଜ ଦାୟିତ୍ବରେ

ହେଉଛନ୍ତି ଆତଯାତ,

ସାଗର ସେମିତି ନାନା ରତ୍ନ ବାଣ୍ଟି

ନିଃସ୍ବାର୍ଥେ ପାଳେ ଦାୟିତ୍ୱ,

ଜଗତକର୍ତ୍ତା ଜଗନ୍ନାଥ,

ପିତାର ଦାୟିତ୍ୱ ନିଭାଇ ସୃଷ୍ଟିର

ପଳନେ ସଦା ଜାଗ୍ରତ ।

ସାହିତ୍ୟିକମାନେ ଲାଗି ପଡିଥା'ନ୍ତି

ପାଳନେ ନିଜ ଦାୟିତ୍ୱ,

ତାଙ୍କର ଲେଖନୀ ଚାତୁର୍ଯ୍ୟତାପୂର୍ଣ୍ଣେ

ଭାଷା ହୁଏ ରୁଦ୍ଧିମନ୍ତ,

ଶିକ୍ଷା ବଢାଏ ମହତ,

ସର୍ବେ ନିଜର ଦାୟିତ୍ୱ ପାଳନରେ

ଜଗତଟା ଆଲୋକିତ ।