ଚଉପଦୀ - ଭଲା ସାଜିଛି ମଦାଳସା
ଚଉପଦୀ - ଭଲା ସାଜିଛି ମଦାଳସା
କବି - ବୀର
ରାଗ -ବେହାଗ ,ତାଳ - ଆଡ଼ ମେଖଟା
ଭଲା ସାଜିଛି ମଦାଳସା
ଖୋଷା ଗେଲେ ଗେଲେ ଲୋ
ମଣ୍ଡିଛି ତଥି ଚମ୍ପା ମାଳତୀ
କେତକୀ ଫୁଲେ ଗୋ । ପଦ ।
ଦେଖି ତା ଶ୍ରୀମୁଖ ଠାଣି
ବଶହେବେ ଶୂଳପାଣି
ଶିଶୁ ସେବିତା କି ଜାଣି
ସିନ୍ଦୂର ବିନ୍ଦୁ ତା ଭାଲେ ଲୋ । ୧ ।
ନୀରଜ କଢ଼ କି ବଢ଼ି
ଦିଶୁଛି ଉରଜ ଯୋଡ଼ି
ତଥିପରେ ପଡ଼ି ହୀରାହାର
କି ମଜାରେ ଝୁଲେ ଲୋ । ୨ ।
ଦିଶେ ଶୋଭା ବେନି ଉରୁ
କି ଓଲଟ ରମ୍ଭାତରୁ
କଟିକି ଦିଶେ ଡମ୍ବରୁ
ଦେଖି ଯତି ଧୃତି ଢଳେ ଲୋ । ୩ ।
ହଂସ ପରାୟେ ଗମନ
ଦିଶଇ ତା ଶୋଭାବନ
ମୋହିନେଲା ଜ୍ଞାନମନ
ବୀର ଏ ଗୀତରେ ଭଣେ । ୪ ।