ଚଉପଦୀ - ଆଉ କି ଘନ କେଶୀକି

କବି - ଗୋପୀନାଥ

ରାଗ -ଦେଶାକ୍ଷ ତାଳ- ତ୍ରିପୁଟା ଓ ଝୁଲା

ଆଉ କି ଘନ କେଶୀକି

ଘନକାଳେ ପାଇବି । ଘୋଷା ।

ଘଡ଼ଘଡ଼ି ରଡ଼ି ଶୁଣି

ଚମକି ରମଣୀମଣି

ଶିବ ଶିବ ବୋଲି ଗୁଣି

କେତେ ଦୁଃଖ ସହିବି । ୧ ।

ହୋଇଲା ଦୁର୍ଦ୍ଦିନ ଦିନ

ବହଇ ଝଞ୍ଜା ପବନ

ଘନ ଘନ ଗରଜନ

କେମନ୍ତେ ମୁଁ ଜୀଇବି । ୨ ।

ଚଞ୍ଚଳା ଯାମୁକି ପରି

ଘନାଳୀ ନଳୀରେ ମାରି

କୁଳିଶ ଚାଳିକି ଭରି

କାମ ବୋଲେ ମାରିବି । ୩ ।

ଭେକ ଶାମୁକଙ୍କ ଧ୍ୱନି

ଶୁଣି ସେ ରମଣୀମଣି

ଆଳି ଅଙ୍କେ ଢଳିବନି

ବିଷ ଖାଇ ମରିବି । ୪ ।

ଜୀବ ଲବ ଥିବ କଣ୍ଠେ

ଭେଟିବି ସତେ ନିକଟେ

ଗୋପୀନାଥ ବୋଲେ ପଟ୍ଟେ

ଚିତ୍ର କରି କହିବି । ୫ ।