ଚଉପଦୀ - ଆଜ ଦେଖିଲିରେ ନବୀନ ବୟସୀ

କବି - ଉପେନ୍ଦ୍ର ଭଞ୍ଜ

ରାଗ -ଆଶାବରୀ ତାଳ- ଆଠତାଳି

ଆଜ ଦେଖିଲି ରେ ।

ନବୀନ ବୟସୀ ବାଳା ।

ପାଇଥାନ୍ତି ଯେବେ ଚନ୍ଦ୍ରବଦନୀକି

କରିଥାନ୍ତି ଗଳାମାଳା । ଘୋଷା ।

ଦୂରୁ ଦେଖି ମୋତେ କୁରଙ୍ଗୀନୟନା

ତର ତର ହୋଇ ଗଲା ।

କାଖେ କୁମ୍ଭ ଘେନି ଲେଉଟି ଚାହାଁନ୍ତେ

ମଦନଶର ଦହିଲା । ୧ ।

ସୁନ୍ଦର କନ୍ଦର୍ପ ଦର୍ପଣ ପରାୟେ

ଝଟକୁ ଥିଲା ତା ମୁଖ ।

ଚାହିଁଲା ମାତ୍ରକେ କ୍ଷୟ ଗଲା ମୋର

ଅଙ୍ଗକୁ କନ୍ଦର୍ପଦୁଃଖ । ୨ ।

କୋଟି କୋଟି ଶିବ ସେବା କରିଥିବ

ଯେ ଥିବ ଗଙ୍ଗାରେ ଧ୍ୟାୟି ।

ବୋଲେ ଉପଇନ୍ଦ୍ର କବିକୁଳଚନ୍ଦ୍ର

ତା ସଙ୍ଗ ଲଭିବ ସେହି । ୩ ।