ଚଉପଦୀ (98)

ଚଉପଦୀ

(98)

ରାଗ – କେଦାର – ଆଦିତାଳ

ପ୍ରାଣନାଥ ବିଜେ ବେଳ ବଳିଲା ରେ (ଘୋଷା)

ସଖି, ହେଲା କି ପାପ              ଦେଖ ଏ ଚନ୍ଦ୍ରାତପ –

ବନ୍ଧା କୁସୁମ ଥୋପ ଆସି ଲୁଳିଲା ରେ (1)

ତୁଟିଲାନି ମୋ ହୃଦ -               ପୁଟେ ଥିଲା ପ୍ରମୋଦ

ମଥାପରୁ କୁମୁଦବନ୍ଧୁ ଟଳିଲା ରେ (2)

ଦେଲା ଆହା କି ଫଳ               ଭଲ ତ ମୋ କପାଳ,

ଲଗାଇଲେ ରସାଳ ନିମ୍ବ ଫଳିଲା ରେ (3)

ମଣ୍ଡାଇଲି ନିବାସ,                  କିପାଁ ହେଲି ଏ ବେଶ,

ଆନେ ତେବେ ଜୀବେଶ ମନ ବଳିଲା ରେ (4)

ଛୋଟରାୟ ନୃପତି,                ବିଜେ କଲେ ଏ ରାତି,

ଜାଣ ସବୁ ସମ୍ପତ୍ତି ମୋତେ ମିଳିଲା ରେ (5)

କବିସୂର୍ଯ୍ୟ ବଳଦେବ ରଥ