ଚକାନୟନ

ନୟନେ ନୟନ ହେ ଚକାନୟନ

    ମିଶିଗଲା ଯେଉଁ ଦିନ

ଭୁଲି ଗଲି ସବୁ ମୋ ଦୁଃଖ ଯାତନା

    ଭୁଲି ଗଲି ମୋ କଷଣ

ପ୍ରଭୁ, ଚାହିଁ ଚାହିଁ ଚକାନୟନ ।

ଚକା ଚକା ଆଖି ଦୁନିଆଁ ପରଖି

    ଇସାରାରେ ପ୍ରତି ପ୍ରାଣ

ଅପଲକ ଜ୍ୟୋତି ଅବାରିତ ପ୍ରୀତି

    ଭରି ଦିଅ ପ୍ରତି କ୍ଷଣ

ଆଖିରେ ଆଖିରେ ତୋ ଭାବ ଭଙ୍ଗୀରେ

    ବାଇ ମୀରା ରାଧା ମନ ।

କମଳ ନୟନ ହେ କଞ୍ଜ ଲୋଚନ

    କମଳ ଯାଏ ମଉଳି

ପଲକ ପଡ଼େନି ଜ୍ୟୋତି ତ ଲିଭେନି

     ଜ୍ୟୋତିର୍ମୟ ତୁମେ ହରି

ଜ୍ୟୋତିରେ ଜ୍ୟୋତିରେ ନୂଆ ପ୍ରାଣ ଭର

    ଧନ୍ୟ ହୁଏ ଧରାଧାମ ।