ଚିତ୍ର ପ୍ରତିମା

ଉତ୍ତଳେ ଯନ୍ତ୍ରରେ କଳାଧଳା ପୁଣି

ରଙ୍ଗୀନ ଚିତ୍ର ପ୍ରତିମା

ଦିଶେ ଅବିକଳ ପ୍ରତିରୂପ ଛବି

ଯେସନ ଭାବ ଭଙ୍ଗିମା ।

ମାନସ ପଟରେ ଉଙ୍କିମାରେ ଯେଉଁ

ଦିବ୍ୟ ରୂପ ଗୁଣ ମାନ

ଆଙ୍କେ ଚିତ୍ର ଶିଳ୍ପୀ ଚିତ୍ର ପ୍ରତିମାକୁ

ଦେଇ ତାର ମନ ଧ୍ୟାନ ।

ଦେବୀ ଦେବତାଙ୍କ ଚାରୁ ଚିତ୍ରପଟ

ଅପୂର୍ବ ତେଜସ୍ଵୀ ରୂପ

ଦେଖିଲେ ମନରେ ଆସେ ଭକ୍ତି ଭାବ

ପ୍ରାଣ ହୁଏ ପୁଲକିତ ।

ମଣିଷ ନିଜର ଚିତ୍ର ପ୍ରତିମାକୁ

ଆହରେ ଯତନ କରି

ପ୍ରମାଣ ସ୍ୱରୂପ କରେ ବ୍ୟବହାର

ସଜାଏ ସ୍ଥାନ ଆବୋରି ।

ସବୁଜ ସୁନ୍ଦର ମନୋରମ ଦୃଶ୍ୟ

ବନ୍ୟ ଜୀବ ପଶୁପକ୍ଷୀ

ସହଜ ସୁଲଭେ ବିରଳ ସ୍ୱରୂପ

ଚିତ୍ରପଟେ ହୁଏ ଦେଖି ।

ଚିତ୍ରପଟ ଦେଖି ଯୋଡି ହୁଏ ମନ

ଭେଟଘାଟ ପ୍ରିୟ ପ୍ରିୟା

ଦୂରେ ଥିଲେ ମଧ୍ୟ ମଣନ୍ତି ନିକଟେ

ସହନ୍ତି ବିରହ ଜ୍ୱାଳା ।

ଯନ୍ତ୍ର କଉଶଳେ ଚିତ୍ର ପ୍ରତିମାରେ

କରି ଓଲଟପାଲଟ

ଠକ ଭଣ୍ଡ କିଛି ଭୁଆଁକୁ ବୁଲାନ୍ତି

ଦେଖାନ୍ତି ହଟଚମଟ ।

ଚାକ୍ଷୁଷ ପ୍ରତ୍ୟକ୍ଷ ଲୋଡ଼ା ତ ପ୍ରମାଣ

ହୋଇପାରେ ଛବି ମିଥ୍ୟା

ଚିତ୍ର ପ୍ରତିମାକୁ କେବଳ ପରତ

ନୁହେଁ ସତ ଭଲ କଥା ।

   --------