ଚିତ୍ର ଚରିତ - 65 : ଘରଟିଏ ଗଢିବା

ଘରଟି ଗଢିବା ମାନବିକତାର ଇଟା-ପଥର ଲଗାଇ,

ଶ୍ରଦ୍ଧାର ସିମେଣ୍ଟ ଲାଗିବ ସେଥିରେ ପ୍ରେମବାଲିକୁ ଗୋଳେଇ |

ଦୁଆର ବନ୍ଧରେ ଲାଗିବ କବାଟ ସ୍ଵାଭିମାନ କାଠପଟା,

ବିବେକ କାଚର ଝରକାଟି ଥିବ ପଶିବନି ପାପ ଛିଟା |

କାନ୍ଥରେ ଲାଗିବ ଦୟାର ପ୍ରଲେପ ସତ୍ୟହେବ ଦୃଢ ଛାତ,

ଶାନ୍ତିର କୋଠରୀ ଥିବ ତା' ଭିତରେ ନଥିବ ଦୁଃଖର ଶୀତ |

ଜ୍ଞାନଦୀପଟିଏ ଜଳୁଥିବ ପୁଣି ତ୍ୟାଗ ଆଲୋକ ଜଳାଇ,

ସେହି ଆଲୋକରେ ଅନ୍ଧ-ବିଶ୍ୱାସର ଅନ୍ଧାର ଯିବ ପଳାଇ |

ନିଷ୍ଠାରେ ସାଧନା କରୁଥିବା ବସି ଶ୍ରମକୁ ନଥିବ ଡର,

ନ୍ୟାୟ ଧର୍ମ ମୈତ୍ରୀ ତିନୋଟି ପତାକା ଉଡୁଥିବ ଫରଫର |