ଚିର ସବୁଜ
ଚିର ସବୁଜ
ମନ ଯା'ର ଚିର ସବୁଜ
ସୁବୁବେଳେ ହସଇ
ହୃଦୟ କ୍ଷେତୁ ସବୁଜିମା
ଆଭା ଛୁଟି ଆସଇ ।
ଶରୀର ଗଛ ବି ପାକଳ
ହେଲେ କାଳଚକ୍ରରେ
ରହଇ ଅପରିବର୍ତ୍ତନ
ପରା ସିଏ ମନରେ ।
ଚେତନାର ଖତ ସାରରେ
ଛନଛନ ବଢ଼ଇ
ତା'ପରି ସୁନ୍ଦର ମହୀରେ
ଆଉ ନୁହଁଇ କେହି ।
କରମକୁ ଭାବି ଈଶ୍ବର
ଲକ୍ଷ୍ୟ ପଥରେ ଧାଇଁ
ଜୀବନ ନଉକା ଖୁସିରେ
ସଦା ବାହି ନିଅଇ ।
ମନ ସୁସ୍ଥ ଥିଲେ ଶରୀର
ସୁସ୍ଥ ପ୍ରମାଣ ଦିଏ
ଦୁଃଖ ଅବଶୋଷ ମନକୁ
କେବେ ଘାରିନଥାଏ ।
ଦରପଣ ସମ ରହଇ
ଆମ ପରିବେଶରେ
କହିଥାଏ ଜଣେ ଆନକୁ
ତା' ଗୁଣ ସମ୍ପର୍କରେ ।
ସଭିଏଁ ଦି'ଦିନ କୁଣିଆ
ପରା ମରତ ଭୂଇଁ
ସବୁଜ ସୁନ୍ଦର ଜୀବନ
କିଆଁ ଧରିବା ନାହିଁ ।