Library
ଛମ୍ ଛମ୍ ବର୍ଷା
ଛମ୍ ଛମ୍ ବର୍ଷା
ଜ୍ୟେଷ୍ଠମାସଖରା ଶେଷେ ଆସିଲୁ ବରଷା
ଭାଇ କୃଷକଙ୍କ ମନେ ବଢିଲା ଭରସା
ଆସ ଆସ ବର୍ଷା ରାଣୀ
ଚାଷ କରିବ ଚାଷୀ ତାର ମନକୁ ଜାଣି !
ଜଳ ବିନୁ ନାହିଁ କିଛି ଜୀବଙ୍କ ଅସ୍ତିତ୍ବ
ଜୀବନ ଦାୟିନୀ ନାମ ବହିଛୁ ତୁହିତ
ଜଳ ହିଁ ପରା ଜୀବନ
ତବ ବିନୁ ହୁଏ ପରା ଏ ଜୀବନ ଶୁନ୍ୟ !
ଆଷାଢ଼ ଶ୍ରାବଣେ ତୁହି ଆଣି ଦେଉ ପ୍ରାଣ
ଜନ ଜନଙ୍କର ପୁଣି ଉତ୍ସବ ପାର୍ବଣ
କରୁ ରାଣୀ ପରିତ୍ରାଣ
ହସି ଉଠେ ଯହିଁ ପ୍ରାଣ ଧରିତ୍ରୀରେ ଜାଣ !
ଶସ୍ୟ ଶ୍ୟାମଳ ଭୂମି ଅତି ଦିଶେ ସୁନ୍ଦର
ପଲ୍ଲବୀ ଉଠେ ଟି ପତ୍ର ବୃକ୍ଷରେ ଆବର
ପୁଷ୍ପ ଗଛେ ପୁଷ୍ପ ଭରା
ବୁଣି ଦିଏ ବାସ୍ନା ତାର ସୁଗନ୍ଧରେ ଧରା !
ବର୍ଷା ରାଣୀ ଆଗମନେ ଭିଜା ଭିଜା ଭୁଇଁ
ଉତ୍ସାହ ଉତ୍ସବ ହୃଦେ ଦେଉ ଥାଏ ଛୁଇଁ
ବାଜେ କାହାଳୀ ମୃଦଙ୍ଗ
ଗୀତ ସଂଗୀତରେ ଚାଷୀ ହୁଏ ଟି ଉମଙ୍ଗ !
ଦିନ ସାରା ତାର ପୁଣି ବ୍ୟତୀତ ବିଲରେ
ତୋଷିବ ଜନଙ୍କୁ ଚାଷୀ ଚାଷେ ନିରନ୍ତରେ
ଜନଙ୍କ ପେଟ ଭରିବ
ରାଷ୍ଟ୍ରରେ ଆଣିବ ଚାଷୀ ଆନନ୍ଦ ବୈଭବ !
ଶକ୍ତିରୂପା ଦେବୀ ମର୍ତ୍ତ୍ୟେ ହେବେ ଆବିର୍ଭାବ
ତାଙ୍କରି ସ୍ବାଗତେ ଭରୁ ସବୁ ଏ ବୈଭବ
କାଶତଣ୍ଡି ଅଙ୍କୁରିତ
ଫୁଲ ତାର ଝୁଲୁ ଥିବ କରିବ ସ୍ବାଗତ !
ବର୍ଷା ରାଣୀ ତୁହି କରୁ ସବୁତ ସମ୍ଭବ
ତବ ବିହୁନେ ସବୁ ହେବ ଅସମ୍ଭବ
ଆସ ଆସ ବର୍ଷା ରାଣୀ
ଦୁର୍ଗା ଆବିର୍ଭାବ ହେବେ ଆସ ତୁ ଧରଣୀ ।
