ଲାଇବ୍ରେରୀ
ପ୍ରୋଫାଇଲ୍
ବନ୍ଧନର ସୂତ୍ର
ବନ୍ଧନର ସୂତ୍ର
ଅମାପ ସ୍ନେହ
ଓ ଅସରନ୍ତି ଶ୍ରଦ୍ଧା
ନିରାସକ୍ତ ମୋହ
ଓ ଈର୍ଷା ହୀନ ସ୍ପର୍ଦ୍ଧା
ସତରେ ସେ ଏକ ଅବିକୃତ ସମ୍ପର୍କଟିଏ
ଯହିଁ ଲେଖା ଥାଏ ନିଷ୍କଳଙ୍କ ଭାବମୟ ଗାଥା।
ଆଜନ୍ମ ପ୍ରତିଶ୍ରୁତି
ଓ ଚିତ୍ତର ପୂର୍ଣ୍ଣ ବିନିମୟ
କିଛି ବିଶୁଦ୍ଧ ଭକ୍ତି
ଓ ରାଣ ନିୟମର ଦାୟ
କେବେ ମୁହଁ ଫୁଲାଫୁଲିର ଅଜସ୍ର ଘଟଣା
ପୁଣି ରାଗ ରୁଷା ଭିତରେ ହସି ଉଠେ ଜୟ ପରାଜୟ।
ଏକ ସୂତ୍ର ମାଧ୍ୟମରେ
ଭଗିନୀର ସୁରକ୍ଷା ଆଶ୍ୱସ୍ତି
ଓ ଦୃଢ଼ ଅଧିକାରରେ
ଏ ବନ୍ଧନର ସମ୍ପୂର୍ଣ ସମ୍ମତି
ଜୀବନର ଅବିଛିନ୍ନ ଅଙ୍ଗ ଏ ମଧୁର ସମ୍ପର୍କ
ଭାଇ ଭଉଣୀର ଏହି ସିନା ଏକ ମାତ୍ର ବିଶୁଦ୍ଧ ସମ୍ପତି।
ଆଶା ଭରସାର
ଏକ ଶକ୍ତ ଡୋରୀଟିଏ
ଓ ପ୍ରୀତି ବରଷାର
ସଦା ପୂର୍ଣ୍ଣ ସ୍ରୋତସ୍ୱିନୀଟିଏ
ଉଦାସ ମୁଖରେ ଯିଏ ସବୁବେଳେ ହସ ଭରିଦିଏ
ଦୁଃଖରେ ଶୋକରେ ସ୍ନେହ ବୋଳା ମୃଦୁ ଆଶ୍ୱାସନାଟିଏ।
ଝଡ଼ ବତାସରେ
ଛିଡେନା ସେ ଡୋରୀ
ସାନ କିମ୍ବା ବଡ଼ ଭଉଣୀର
ଏ ଏକ ସୁରକ୍ଷା ପାଚିରୀ
ଅତି ଦୁର୍ମୂଲ୍ୟ ସେ ଭାବ ବିହ୍ଵଳ ପରାଣେ
ଭରି ଦିଏ ପୂର୍ଣ୍ଣ ସୁଖ ଶାନ୍ତିର ଆଞ୍ଜୁଳି।
ନଲାଗୁ କେବେ କଳଙ୍କ
ନଛିଡୁ ଏ ରକ୍ଷା ସୂତ୍ର
ଛିଡ଼ି ଯାଉ ଯେତେ ସବୁ ଅଙ୍କ
ଚମକୁ ଏ ଭାବମୟ ଚିତ୍ର
ମଧୁରତାର ଏମିତି ଏ ଏକ ସ୍ଵଛ ଦ୍ରବଣରେ
ଫୁଟି ଉଠୁ ସମ୍ପର୍କର ନିର୍ମଳ ଚରିତ୍ର।
