ଛଅସ୍ତରୀ ବର୍ଷରେ ଆମ ସ୍ୱାଧୀନତା
ଛଅସ୍ତରୀ ବର୍ଷରେ ଆମ ସ୍ୱାଧୀନତା
ବହିଯାଇ ଅଛି ଦୀର୍ଘ ଛଅସ୍ତରୀ ବର୍ଷ
ସ୍ୱାଧୀନରେ ଆମ୍ଭେ ଉଲ୍ଲସିତ ହର୍ଷ ହର୍ଷ ।
ବହିଯାଇଅଛି ଜାହ୍ନବୀରେ କେତେ ପାଣି
ଉଲ୍ଲସିତ ଦେଶବାସୀ ଭାଇ ଓ ଭଉଣୀ ।
ସ୍ୱାଧୀନ ଚେତନା ଆଉ ସ୍ୱାଧୀନ ଚିନ୍ତନ
ସ୍ୱାଧୀନ ବକ୍ତବ୍ୟ ଆଉ ସ୍ୱାଧୀନ ଭାଷଣ ।
ସଗର୍ବେ ଉଡ଼ଇ ଉଚ୍ଚେ ଆମ ତ୍ରିରଙ୍ଗା
ଜାତିର ଗରବ ଆମ ଜାତୀୟତା ଗଙ୍ଗା ।
ବିଶ୍ୱରେ ବୁହତ୍ତ ଅଟେ ଆମ ପ୍ରଜାତନ୍ତ୍ର
ପ୍ରଜାର ଶାସନ, ପ୍ରଜା ମନ୍ତ୍ରେ ଗଣତନ୍ତ୍ର ।
ବିଶ୍ୱରେ ଅଗ୍ରଣୀ ଅଟେ ଆମ୍ଭ ଅର୍ଥନୀତି
ଉଦାହରଣୀୟ ଆମ୍ଭ ଦେଶର ପ୍ରଗତି ।
ସମୟ ଆସିଛି ଏବେ ଆତ୍ମ ନିରୀକ୍ଷଣ
ଯଥାର୍ଥେ କି ଆମେସବୁ ସ୍ୱତନ୍ତ୍ର,ସ୍ୱାଧୀନ?
ସଫଳ ହୋଇଛି କିବା ଆମ ସ୍ୱାଧୀନତା
ସ୍ୱାଧୀନ ବାରତା ସ୍ୱାଧୀନତା ଯଥାର୍ଥତା ।
ଦୂର ହୋଇଛି କି ଆମ ସମାଜେ ଦୂରତା
ଦୂର ହୋଇଛି କି ଅର୍ଥନୀତି ବୈଷମ୍ୟତା ।
ବିଦ୍ୟାର୍ଥୀ ଲଭନ୍ତି ଶିକ୍ଷା ଭିକ୍ଷୁ ଲଭେ ଭିକ୍ଷା
ନାଗରିକ ଦେଶ ମନ୍ତ୍ରେ ନେଇଛନ୍ତି ଦୀକ୍ଷା।
ପ୍ରଗତି ପହଞ୍ଚିଛି କି ଜନତାର ପାଶେ
ଦେଶରେ ନ ମରେ କେହି ରହି ଉପବାସେ ।
ନାରୀର ସୁରକ୍ଷା ପୁଣି ବାଳିକା କଲ୍ୟାଣ
ରୋକି ପାରିଛନ୍ତି କିବା ହତ୍ୟା କନ୍ୟାଭୃଣ ।
ଏହିପରି ଆସୁଅଛି ଚିନ୍ତା କେତେ ମନେ
ଅନୁକ୍ଷଣେ ସମୀକ୍ଷଣେ ଆତ୍ମୀୟ ଚିନ୍ତନେ ।
ପାଳିଅଛୁ ଆମ୍ଭେ ଏବେ,ଅମୃତ ଉତ୍ସବ
ଜୟ ହିନ୍ଦ୍ ନାଗରିକେ ଉତ୍ତର ଖୋଜିବ ।