ଚାଲ ଆମେ କଥା ହେବା

 ଚାଲ ଯିବା ସାଥି ହୋଇ ଗୋଟେ ନୂଆ ଦୁନିଆକୁ

ଯେଉଁଠି ଥିବ ପୂର୍ଣ୍ଣିମା ଚାନ୍ଦର ଆଲୋକ

ଆଉ ଶାନ୍ତ ସ୍ନିଗ୍ଧ ଶୀତଳତା

ଯେଉଁଠି ଥିବ ସୋରିଷ ଫୁଲର କ୍ଷେତ

ଆଉ ଭରା ଶ୍ରାବଣର ଆର୍ଦ୍ରତା

ଯେଉଁଠି ଥିବ କୁଳୁକୁଳୁ ହୋଇ ବହି ଯାଉଥିବା ଝରଣା

ଆଉ ଚାରି ପାଖରେ ନିର୍ମଳତା

ସେଇ ଝରଣା କୂଳରେ ବସିଥିବା 

ତୁ ଆଉ ମୁଁ

ମନ୍ଦ ମଳୟର ସ୍ପର୍ଶରେ

ଚହଳି ଉଠୁଥିବ ଦେହ ଆଉ ମନ

ଯେଉଁଠି ମିଶୁଥିବ ଧରା ସହ ନୀଳ ଗଗନ

ସବୁ ଆଡେ ନୀରବ ଆଉ ନିଃଶବ୍ଦ

ହଠାତ୍ ଭାସି ଆସିବ ଦୂର ଦିଗନ୍ତରୁ ବଂଶୀର ସୁର

ଆମେ ଦୁହେଁ ହଜିଯିବା ପରସ୍ପରର ସାନ୍ନିଧ୍ୟରେ

ନାଁ ଥିବ ମିଛ ମାୟାର ବନ୍ଧନ

ନାଁ ଥିବ ଅପବାଦର ଗୁଂଜନ

କେବଳ ଥିବ ସଂଧ୍ୟା ଆଳତିର ପବିତ୍ରତା

ଶାନ୍ତ ମନର ନିଚ୍ଛକ କୋମଳତା

ଥିବ ସବୁ କିଛି ସୁମଧୁର

ତା ସହ ମହ ମହ ବାସ୍ନା ମଲ୍ଲୀ ଫୁଲର

ଚାହୁଁଛି ନିଷ୍କ୍ରିୟ ହବାକୁ

ଲାଲ୍ ରଂଗର ତୋର ସେଇ ସ୍ମିତହାସ୍ୟର ଦୁନିଆକୁ

ଆକୁଳ ନିବେଦନର ପ୍ରେମ ଆଭରଣକୁ

ନେଇଯାଆ ମତେ ତୋ ଦୁନିଆକୁ