Library
ବୁଦ୍ଧିମତୀ ସାବିତ୍ରୀ
ବୁଦ୍ଧିମତୀ ସାବିତ୍ରୀ
ଅଶ୍ବପତିସୁତା ସତୀ ବିଚକ୍ଷଣା ବୁଦ୍ଧିମତୀ
ଧନ୍ୟ କହିବା ତୁମ୍ଭର ଖଗୋଳ ଜ୍ଞାନ
ଜାତକେ କାଳନୃପତି ନିରପେକ୍ଷ ଜନ୍ତୁପତି
ନିୟତି ଲିଖନେ କଲେ ମୃତ୍ୟୁ ପ୍ରଦାନ
ଆକର୍ଷିଲେ ପତିଙ୍କ ପ୍ରାଣ
ଜ୍ୟୋତି ବଳେ ଶମନଙ୍କୁ କଲ ସନ୍ଧାନ ।
ପତିପଦେ ରଖି ପ୍ରୀତି ବରିଥିଲ ତ୍ୟଜି ଭୀତି
ଅଳ୍ପାୟୁ ଜାଣନ୍ତେ କରି ପାଣି ଗ୍ରହଣ
ବନେ ହରାଇଲ ପତି ବଲ୍ଲଭଙ୍କ ଶେଷଗତି
ଅକାଳେ ହୁଅନ୍ତେ କୋଳେ ଘେନି ବହନ
ପଥ ରୋଧି ସ୍ତୁତି ବାଚନ
ମହାକାଳେ କଲ ପ୍ରାଣନାଥ ଯାଚନ ।
ଶ୍ରବଣେ ତୁମ୍ଭ ବିନତି ବିହ୍ବଳ ହୁଅନ୍ତେ ଅତି
କ୍ରମେ କଲେ କଲ୍ୟାଣର ବର ବିଧାନ
ଶ୍ବଶୁର ଯାତନା ଚିନ୍ତି ପିତର ମଙ୍ଗଳେ ପ୍ରୀତି
ଚକ୍ଷୁଦାନ ରାଜ୍ୟଭୋଗେ ପ୍ରାପ୍ତ ନିଦାନ
ମହିମା ତୁମ୍ଭର ଗୋ ଧନ୍ୟ
ତଦନ୍ତରେ ବାଞ୍ଛା ରଖ ନିଜ ନିଧନ ।
ରୋଦନେ ପ୍ରବଳ ଭ୍ରାନ୍ତି ଅସମର୍ଥ କାଳ ଦାନ୍ତି
ବିଷମ ଦ୍ବନ୍ଦରେ ଭାଳି ସତୀ ବଚନ
ବିଲୋକି ତତ୍ପର ସ୍ଥିତି ଆକୁଳଚିତ୍ତେ ସାବିତ୍ରୀ
ଶତସୁତ ମନାସି କରିଲେ ଅର୍ଚ୍ଚନ
ପତିଙ୍କ ଔରସେ ରକ୍ଷଣ
ତଥାସ୍ତୁ କହିଲେ ଯମ ଭ୍ରମେ ତକ୍ଷଣ ।
ପତିପ୍ରାଣ ନମାଗନ୍ତି ଖଗୋଳ ବିଜ୍ଞାନେ ମତି
ଯମଲୋକରୁ ଭୂଲୋକେ ହେଲେ ପତନ
ବିଅର୍ଥ ହୁଅନ୍ତା ଗତି ଆକର୍ଷଣ ବଳେ କ୍ଷତି
ଅଦ୍ବିତୀୟ ପତି ଘଟେ ମୂଳ ଯତନ
ସତୀତ୍ବ ନହୁଏ ଖଣ୍ଡନ
ମହାସତୀଙ୍କର ହେଲା ଯଶମଣ୍ଡନ ।
