ବସନ୍ତ ଯାଆନି ଫେରି

ବସନ୍ତ ଯାଆନି ଫେରି,

ମାଡ଼ି ଆସିଲାଣି ମୁଣ୍ଡଫଟା ଖରା,

ଡର ଲାଗୁଛି ରେ ଭାରି ।୧)

ଖରାରେ ଭିଭିବା ସାର,

ଶୀତ ନ ସରୁଣୁ ଗ୍ରୀଷ୍ମ ପ୍ରବାହ

ଏବେଠୁ ହେଲାଣି ସ୍ଥିର ।୨)

ମଣିଷ ଯାଉଛି ହାରି,

ସବୁତ ନିଜର କୃତକର୍ମ ଫଳ,

କା' ଆଗେ ହେବ ଗୁହାରି ? ।୩)

ବସନ୍ତ ଯାଆନି ଫେରି,

ଫୁଲର ସମ୍ଭାର ଫଗୁଣ ଆଣିଛି,

ଡାକୁଛି ରେ ହାତଠାରି ।୪)

ଅନନ୍ୟ ତୋହରି ଦାନ,

ଏ ଜୀବନ ଖାଲି ମରୁଭୂମି ବାଲି,

ଵସନ୍ତ ! ତୁ ମରୂଦ୍ୟାନ ।୫)

କରନାହିଁ ଆଉ ମନା,

ତୋ ଲାଗି ବୃକ୍ଷରେ ନବ-ପଲ୍ଲଵ,

ଫୁଲ, ଫଳ ଭରା ସିନା ।୬)

ଭାବୁକ ରହିଛି ଚାହିଁ,

ଅବିର ରଙ୍ଗରେ ଭିଜିଵ ଟିକିଏ,

ନିରାଶ କରିବୁ ନାହିଁ ।୭)

ବସନ୍ତ ଯାଆନି ଫେରି,

ହସ ଟିକେ ଦେ' ମଣିଷ ମନରେ,

କରୁଛି ତତେ ଗୁହାରି ।୮)

ଅପେକ୍ଷା କରିଛି ତତେ,

ଵିଭୂ-ଚେତନାର ଅଂଶ ତୁ' ପରା,

ଠକିବୁ ନାହିଁ ରେ ମତେ ।୯)

ବସନ୍ତ ଯାଆନି ଫେରି,

ଶୀତଳ କରିଦେ ମଣିଷ ଜୀବନ,

ଦେଇଯା'ରେ ଆଶା-ବାରି ।୧୦)