ବସନ୍ତ ଉତ୍ସବ

ବଧୁଲି ବେଶରେ ସାଜିଛି ପ୍ରକୃତି

ଅତିଥି ମଧୁ ବସନ୍ତ

ବଧାଇ କରୁଛି ବଦ୍ଧାଞ୍ଜଳି ବାଢ଼ି

ଜଗ ହେଉ ସ୍ନିଗ୍ଧ ଶାନ୍ତ ।

ରମ୍ୟ ଋତୁରାଜ ଜୀବ ପ୍ରାଣ ସ୍ରଷ୍ଟା

ମୁହୁର୍ମୁହୁଃ ମଧୁ ବାସ

ପ୍ରୀତି ପ୍ରଦାୟକ ପ୍ରସନ୍ନ ବାହକ

ପ୍ରଭାସ ତାହାର ଦାସ ।

ସ୍ନେହର ନିର୍ଝର ସତେ ଧରାଧର

ବର୍ଷଣ ଯେ ଅବିରାମ

ରଙ୍ଗର ଫୁଆର ମତୁଆଲା ପରି

ହୋଇଛି ସୌହାର୍ଦ୍ଦ୍ୟପୂର୍ଣ୍ଣ ।

ନବ ବିକଶିତ ପର୍ଣ୍ଣ ପଲ୍ଲବିତ

ଅତି ମନୋରମ ଦିଶେ 

ନିମ୍ନ ଗଗରରେ ଶୁଭ୍ର ରେଖା ରୂପେ

ବିହଙ୍ଗର ପଂକ୍ତି ଭାସେ ।

ଯାମିନୀ ରାଜତ୍ୱ ମଉଳି ଯାଇଛି

ଚାନ୍ଦିନୀ ମେଲିଛି ଡେଣା

ମନୀଷା ପୁରଣେ ଜହ୍ନକୁ କରିଛି 

ପ୍ରୀତି ପିଆଲିରେ ପଣା ।

ମନ କୁଲାୟରେ ଖିଆଲି ବିହଙ୍ଗ

ଆନନ୍ଦେ କରିଛି ବସା 

ମୃଦୁ ମଳୟର ଭେରୀ ତାନ ଶୁଣି

ଫଗୁରେ ଜଡ଼ିତ ନିଶା ।

ଆଦ୍ୟରୁ ପ୍ରାନ୍ତ ଯେ ବସନ୍ତ ଉତ୍ସବ

ଅନୁଭୂତେ କରେ ପ୍ରୀତ

ବିବିଧ ରଙ୍ଗରେ ଅଳଂକୃତ ହୋଇ

ସଂସାରରେ ବିଭାସିତ ।